सिरहाः घुर्मीबजारमा १० दिने योग शिविर सम्पन्न, केहिको तौल समेत परिवर्तन

न्यूज ब्यूरो, सिरहा । मानव जीवनलाई स्वास्थ र स्फुर्त एवम् संस्कारयुक्त योगमैत्री समाज निर्माण गर्ने उद्देश्यले पतञ्जली योग समिति मिर्चैयाको आयोजनामा १० दिने मोटोपन घटाउने निःशुल्क योग शिविर सम्पन्न भएको छ । मोटोपन नियन्त्रण गर्ने हेतुले सिरहाको मिर्चैया नपा ९ घुर्मी बजारस्थित शिव मन्दिरको प्रांगनमा सञ्चालन गरिएको १० दिने योग शिविर सम्पन्न भएको हो ।

गत भदौ १३ गतेदेखि आज भदौ २३ गतेसम्म चलेको सो शिविरमा मोटोपन नियन्त्रण गर्न तथा स्वस्थ रहन विभिन्न मुद्रामा आधारित योग अभ्यासको प्रशिक्षण गराइएको पतञ्जली योग समिति मिर्चैयाका अध्यक्ष अकलदेव सिंहले बताउनुभयो । शिविर विहान ४ः३० देखि ६ः३० बजेसम्म सञ्चालन भएको थियो ।

योग शिविरमा पतञ्जली योग समिति मिर्चैयाका अध्यक्ष तथा चिकित्सक पेशामा समेत संलग्न रहनुभएका अकलदेव सिंहले योग प्रशिक्षण दिनुभएको थियो । उत्साहजनक रुपले शिविरमा मानिसहरुको सहभागी रहेको आयोजकले जनाएको छ ।

शिविरमा थुप्रैजना लाभान्वित भएका थिए । शिविरबाट केहिजनाको तौल समेत घटबढ भएको छ ।

पतञ्जली योग समिति मिर्चैयाका अध्यक्ष अकलदेव सिंहको अध्यक्षतामा सम्पन्न समारोहमा प्रमुख अतिथिका रुपमा पतञ्जली योग समिति प्रदेश नं. २ का अध्यक्ष हरिहर चौधरी रहनुभएको थियो भने विशिष्ट अतिथिका रुपमा मिर्चैया वडा ९ का वडाध्यक्ष मोहन प्रसाद पोखरेल रहनुभएको थियोे ।

शिविर समापन समारोहमा विशिष्ट व्यक्तित्वहरुलाई मायाको चिनोसहित सम्मान समेत गरिएको सहकर्मी बिटु सिंहले बताए ।