महोत्तरीमा जेष्ठ नागरिकलाई सांसदद्धारा सम्मान

न्यूज ब्यूरो, महोत्तरी । महोत्तरीको मटिहानी नगरपालिकाका ६० जना जेष्ठनागरिकलाई छाता टर्च र दोसल्ला सम्मान सहित उपहार दिइएको छ । ७५ वर्ष उमेर पुरा गरिसकेका मटिहानी नगरपालिका वडा नं. ६, ७ र ८ का जेष्ठ नागरिकलाई प्रतिनिधी सभा सदस्य महन्थ ठाकुर र प्रदेश २ का सामाजिक विकास राज्यमन्त्री अभिराम शर्माको हातबाट सम्मान र उपहार दिइएको हो ।

सोहि अवसरमा वोल्दै प्रतिनिधी सभा सदस्य महन्थ ठाकुरले आफ्नो वृद्ध अभिभावकको सम्मान हरेक नागरिकले गर्नुपर्ने बताए ।

उनले आफ्नो अभिभावकको सम्मान र उनीहरुसंगको राम्रो व्यवहारले समाजमै नाक उचो हुने भएको बताउदै आफ्नो जन्मदाताको सेवा नै परमधर्म भएको बताए । उनले मानिस धर्म कमाउन विभिन्न धाम जाने गरेपनि आफ्नो अभिभावकको सेवा भन्दा ठुलो कुनै धाम नभएको थपे ।

मटिहानी नगरपालिकाको स्रोतबाट उपलब्ध गराइएको सामग्री र सम्मान ग्रहण गर्दै जेष्ठनागरिकहरुले यो उमेरमा अधिकांशको आफन्तले समेत साथ छोड्ने गरेकोमा मटिहानी नगरपालिका र नेताज्युहरुले सम्झेकोमा कृतज्ञता व्यक्त गरे ।

यता, मटिहानीका मेयर हरि प्रसाद मण्डलले मटिहानी नगरपालिका भित्र कुनै पनि जेष्ठ नागरिकको मान सम्मान र उनको रेखदेखमा सन्तान तथा परिवारले समस्या पारे तत्काल सुचित गर्न आग्रह गरे । उनले हामी समेत समय आएपछि सोहि अवस्थामा पुग्ने भएकोले अभिभावकको सम्मान गर्नुपर्ने बताए ।