सिरहाः कर्जन्हामा सुरुङ खनेर लाखौंको चोरी

न्यूज ब्यूरो, सिरहा । सिरहाको कर्जन्हा नगरपालिकामा गएराति सुरुङ खनेर लाखौंको चोरी भएको छ । विहीबार राति करिब १२ बजेको समयमा लुटेराहरुको एक समूहद्धारा कर्जन्हा नगरपालिका ७ को २ घरमा सुरुङ खनेर लाखौंको धनमाल चोरिएको हो ।

कर्जन्हा नपा वडा ७ मरेबा (दक्षिणबारी टोल) निबासी स्थानीय राजलाल मण्डल र रामजतन मण्डलको घरमा सुरुङ खनेर चोरी भएको छ भने स्थानीय लक्षमण मण्डलको घरमा सुरुङ खनेर चोरीकोे प्रयास भएको कर्जन्हा नपा वडा ७ का वडाध्यक्ष जयकिशोर साहले जानकारी दिए ।

राजलालको घरबाट ६० हजार नगद, साढे ७ तोला सुन र ८० तोला चाँदी तथा रामजतनको घरबाट ४० हजार नगद, २ आना सुन र ४५ तोला चाँदी चोरी भएको वडाध्यक्ष साहले बताए । राजलालको घरबाट जम्मा करिब साढे ५ लाख र रामजतनको घरबाट करिब ८० हजार गरी ६ लाख ३० हजार रुपैयाँ बराबरको चारी भएको बताइएको छ ।

पछिल्लो समय त्यस क्षेत्रमा चोरको बिगबिगी देखिएको स्थानीहरुले बताए । चोरी भएको ठाउँदेखि मात्र करिब ३ किलोमिटरको दुरीमा कर्जन्हा प्रहरी चौकी छ । नजिकैमा प्रहरी चौकी रहेपनि पटकपटक यस प्रकारको घटना भईरहँदा स्थानीय जनताहरु असुरक्षित रहेको प्रष्टिएको एकजना स्थानीयले गुनासो पाखे ।

यता, चोरीको घटना भएको थाहा पाएर वडा ७ का वडाध्यक्ष र कर्जन्हा प्रहरी चौकीबाट विहान प्रहरी घटना स्थलमा पुगेका छ भने ईप्रका मिर्चैयाबाट समेत प्रहरीको टोली घटना स्थलमा गएको छ ।

घटनाबारे अनुसन्धान तिब्र पारिएको ईप्रका मिर्चैयाका प्रहरी नायव उपरीक्षक दिपेन्द्र शाहले बताउनुभयो ।