सम्सी गाउँपालिकामा आन्दोलनरत स्वास्थ्यकर्मीहरुको माग सम्बोधन हेतु तत्कालै पहल हुने

न्यूज ब्यूरो, महोत्तरी । सम्सी गाँउपालिकाका प्रमुख शेख फारुखले आन्दोलनरत स्वास्थ्यकर्मीहरुको तत्कालै माग सम्बोधनको लागि पहल गर्ने भएको छ । हिजो दोस्रो दिन गाँउपालिकाको मुलगेटमा धर्नामा बसेका स्वास्थ्यकर्मीहरुसँगको बार्ताको क्रममा अध्यक्ष शेखले विहीबारका दिनदेखि कार्यालयमा लेखापालको व्यवस्था गरिने र सर्वप्रथम स्वास्थ्यकर्मीहरुको माग सम्बोधन गराउने प्रतिवद्धता जनाउनुभएको हो ।

त्यस्तै सोही क्रममा अध्यक्ष शेखले गाँउपालिकाभित्र रहेको हरेक स्वास्थ्यसंस्थालाई निगरानी गर्नका लागि एक समिती गठन गरिने जनाउनुभएको छ ।

यता आन्दोलनरत स्वास्थ्यकर्मी राघेन्द्र यादवका अनुसार आफुहरु तत्कालै गाँउपालिकाको प्रमुखको आश्वासनमाथि विश्वास गर्न नसकिने बताउनुभएको छ ।

यसअधि पनि गाँउपालिकाले अनेकौपटक आफुहरुको समस्याको समाधानको लागि झुठो आश्वासन दिईएकोले आफुहरु तत्कालै धर्ना फिर्ता नलिएको यादवले जनाएको छ । आफुहरु भोली पुनः धर्ना दिन आउने जनाउनुभएको छ ।

सम्सी गाँउपालिकाका स्वास्थ्यकर्मीहरुले तलब र भताको माग गर्दै गाँउपालिकाको कार्यालयको मुलगेटमा मंगलवारदेखि धर्ना दिदै आएका छन् ।