आपराधिक गतिविधी कम गर्न प्रहरीको विशेष अभियान, शंकास्पद व्यक्तिहरु नियन्त्रणमा लिदै

न्यूज ब्यूरो, महोत्तरी । महोत्तरीमा चालु आर्थिक वर्षमा आपराधिक गतिविधी ह्वात्तै वढेपछि प्रहरीले विशेष अभियान सुरु गरेको छ ।

आपराधिक गतिविधी र घटना घटाउने मुख्य जिम्मेवार लागुऔषध र मदिरा सेवनकर्ता रहेको तथ्यहरुले देखाएपछि प्रहरीले फिल्टरिंग कार्य सुरु गरेको छ । बर्दिवासमा केहि दिन पुर्व देखि नै अभियान संचालनमा रहेपनि जलेश्वर तथा वरिपरीका क्षेत्रमा भने आईतवार देखि अभियान सुरु गरिएको जिल्ला प्रहरी कार्यालय महोत्तरीका एसपी ईश्वर कार्कीले वताए ।

उनले अधिकांश प्रकृतिको अपराधमा ट्वावलेट र ईन्जेक्सन लिने तथा अन्य विभिन्न किसिमका लागु औषध सेवन गर्नेहरुको सहभागिता देखिन आएको र विभिन्न अन्तरकृया मार्फत समेत यस्तै ट्यापेहरुले मुख्य जिम्मेवार हुने गरेको तथ्यहरु आएपछि फिल्टरिंग अभियान सुरु गरिएको थपे ।सोहि अभियान अन्तर्गत जलेश्वरका विभिन्न स्थानबाट आईतवार नै दर्जन भन्दा वढी शंकास्पद युवाहरुलाई सोधपुछ गर्न ल्याएको र उनीहरुसंग आपराधिक गतिविधीमा लागे वा नलागेको लगायतका सोधखोज गरिएको वताए ।

त्यसता कुनै पनि गतिविधीमा नलागेका तर त्यसता युवाहरुको संगतमा लागेका युवाहरु तथा उनका अभिभावकहरुलाई त्यसतो गतिविधीमा लागे हुन सक्ने नोक्सानी वारे वुझाउदै वाईज्जत उनीहरुलाई फिर्ता पठाईने गरिएको समेत एसपी कार्कीले थपे ।

गत भाद्र १० गते आईतवार मात्र औरही नगरपालिका वडा नं. १ स्थित आफ्नै फैन्सी स्टोरबाट अपहरणमा परि हत्या भएकि ९ महिना कि वालिकालाई हत्या गर्ने अभियुक्त समेत यस्तै लागु औषध दुव्र्यसनी नै रहेकोले यस तर्फ वढी चनाखो भईएको एसपी कार्कीका भनाई छ । उक्त घटनामा समेत अभियुक्त पक्राउ पर्न नसकेपनि आफुहरुको प्रयास भने जारी रहेको थपे ।

यस्तो छ अपराधको तथ्यांक :

महोत्तरीमा गत महिना श्रावणमा मात्र तिन वलात्कार र ४ बलात्कारको प्रयास भएको मुद्दा दर्ता गरिएको छ भने यसै महिनाको आज १८ गतेसम्म बलात्कारको २ र बलात्कार प्रयासको १ घटना दर्ता भएको प्रहरीको तथ्यांक छ । यता गत आर्थिक वर्षमा १३ बलात्कार र १२ प्रयासका मुद्दा दर्ता भएका थिए । यसले समेत अपराधको रफ्तार वढ्दै गई महिला तथा वालवालिकाहरु असुरक्षित हुदै गएको देखाएको छ । त्यसतै लागु औषध मुद्दामा समेत श्रावण महिनामा मात्र ५ जनामाथी मुद्दा दर्ता भएको देखिन्छ ।

महिला हिंसाको पनि उस्तै छ हाल :

महोत्तरीमा चालु आर्थिक वर्षको पहिलो महिनामा मात्र महिला हिंसाका विभिन्न शिर्षकमा ३५ उजुरी परेको देखिन्छ । सो मध्ये १५ मा मिलापत्र भएको प्रहरीको तथ्यांक छ भने केहि उजुरी परेपछि स्थानिय तहमै उजुरी मिलाउने वडाअध्यक्षहरुले जानकारी गराएको तर उक्त उजुरी उपर सुनुवाई भए नभएको वारे जानकारी नआएको महिला तथा वालवालिका सेवा केन्द्रले जनाएको छ ।

अधिकांस उजुरी श्रीमान तथा ससुराली पक्षका आफन्त विरुद्धको हुने र सोमा समेत कुटपिट,खान लाउन नदिएको र वहु विवाहको उजुरी रहेको देखिन्छ । कुटपिटका उजुरीहरुमा समेत श्रीमानले मादक पदार्थ सेवन गरि कुटपिट गरेको तथ्य उजुरीमा खुलाइएको छ ।

अपराधको ग्राफ तल झार्छौ :

महोत्तरीमा लागु औषध प्रयोगकर्ताको संख्या वढीरहेकोले त्यसलाई नै न्युनिकरण गर्ने आफ्नो पहिलो प्राथमिकता रहेको एसपी कार्कीको भनाई छ । उनले चारी,लुटपाट तथा महिला हिंसा लगायतका घटनाहरु तथा अन्य घटनाहरुमा समेत लागु औषध सेवन कर्ताकै भुमिका देखिएकोले आफुले यसैलाई फोकस गरेको र यसले निश्चय पनि अपराधको ग्राफ तल झार्ने उनको भनाई छ ।

उनले प्रहरीले जतिसुकै अभियान चलाएपनि यस्ता गतिविधी रोक्न भने अभिभाकको भुमिका अहम हुने थपे । आफ्ना वालवालिकाहरु कस्तो वाटो तिर जादैछन उनीहरुको गतिविधी के कस्तो भईरहेको छ र गलत बाटो तिर सन्तान लाग्न खोजिरहेका छन भने अभिभावकले आफ्ना सन्तानलाई त्यसतो कुलतबाट र गलत बाटोबाट पुनः सामान्य जिवनमा फर्काउन प्रयास आजै देखि थाल्नु पर्ने हुन्छ ।

आफुहरुको भुमिका हुदा हुदै र आफुहरुले दायित्व निर्वाह गरिरहेको वेला अभिभावकहरुको समेत आफ्नो सन्तानको कृयाकलाप माथी निगरानी र त्यसलाई सचेत गराउने कार्य भए निश्चय पनि महोत्तरीमा अपराध ह्वात्तै घटने निश्चित छ ।

वालवालिका प्रति चनाखो हुन आवश्यक :

चालु आर्थिक वर्ष र गत आर्थिक वर्षमा समेत घटेका बलात्कार,हत्या,अपहरण लगायतका घटनाहरुमा वालवालिकाहरु समेत परेकोले अभिभावकहरुले आफ्ना वालवालिकाको सुरक्षा वारे सचेत हुनु आवश्यक देखिन्छ ।

औरहीकै हत्याकाण्ड,सो भन्दा पहिले एक बलात्कारको घटना र गत आर्थिक वर्षमै विभिन्न बलात्कार र सो को प्रयास तथा अन्य विभिन्न घटनाहरुमा वालवालिकाहरु नै अपराधीको आँखामा पर्ने गरेकोले अभिभावकहरु सचेत भई अपरिचित व्यक्तिहरुसंग वालवालिकालाई खेल्न वा कुरा गर्न नदिने तथा अन्य विभिन्न सावधानी अपनाउनु पर्ने एसपी कार्कीको कथन छ ।