महोत्तरीमा डेंगुको महामारी, रोकथाम गर्न अभियान जारी

न्यूज ब्यूरो, महोत्तरी । महोत्तरीमा पुनः डेंगुको संक्रमण देखिएको छ । जलेश्वर नगरपालिका वडा नं. ८ बजराहीमा डेंगुका विरामी फेला परेका हुन ।

विरामीको अवस्था हाल सुधारोन्मुख रहेको जिल्ला स्वास्थ्य कार्यालयले जनाएको छ । यता प्रदेश २ को सामाजिक विकास मन्त्रालयको निर्देशनमा डेंगु नियन्त्रणको लागि अभियान सुरु भएको हो ।

जिल्ला स्वास्थ्य कार्यालयमा डेंगु नियन्त्रण शिर्षकमा बजेट नभएकोले अभियान चलाउन समस्या हुने सक्ने भएपनि मन्त्रालयले नै निर्देशन दिएपछि अभियान सुरु भएको जिल्ला स्वास्थ्य कार्यालयका जनस्वास्थ्य निरिक्षक संतोष ठाकुरले बताए ।

जनस्वास्थ्य निरिक्षक तथा फोकल परसन ठाकुरले गत साता मात्र बर्दिबासमा थप एक विरामी गरि हालसम्म दुई जनाको पहिचान भईसकेको र एक शंकास्पद रहेको बताए । उनले गत वर्ष ८४७ जनामा डेंगु देखिएकोमा यस वर्ष रोग सुरुमै नियन्त्रण गर्न आफुहरु विभिनन अभियान मार्फत लागिपरेको बताए ।

यता डेंगुको पहिचान गर्न चाहिने किट सामाजिक विकास मन्त्रालय र जिल्ला स्वास्थय कार्यालयको पहलमा २५० थान डेंगु किट इपिडेमियोलोजी तथा रोग नियन्त्रण महाशाखाबाट उपलब्ध भईसकेको बताए ।

यता प्रदेश २ का सामाजिक विकास मन्त्री नवल किशोर साह र राज्यमन्त्री अभिराम शर्माले विहिवारमात्र जलेश्वर अस्पतालमा भएको डेंगु ज्वरो सम्बन्धि अभिमुखिकरण कार्यक्रममा तत्काल डेंगु नियन्त्रणको लागि अभियान चलाउन निर्देशन दिएका थिए ।

सोहि निर्देशन अनुसार जिल्ला स्वास्थय कार्यालयले डेंगु नियन्त्रणको लागि सर्च एण्ड डिस्ट्रोय अभियानको सुरुवात भएको हो । अभियानमा जनप्रतिनिधी,रेडक्रस सोसाईटी,शान्ति तथा विकासका लागि युवा संजाल(वाईएनपिडी) तथा अन्य विभिन्न संगठनहरुले समेत सहयोग गरेको जनाइएको छ ।