सिरहामा भारतीय बजारबाट चोरेर ल्याइएको करिब एक लाखको सामान प्रहरीद्वारा बरामद

न्यूज ब्यूरो |

सिरहा, ५ भदौ । सिरहाको सीमावर्ती क्षेत्रमा प्रहरीले चेकजाँच गर्दा सोमबार साँझ भारतीय बजारबाट चोरेर ल्याइएको करिब एक लाख रुपैँया बराबरको सामान बरामद गरेको छ ।

बरामद गरिएको सामानहरुमा खानेतेल, बिस्कुट, भुजिया, चकलेट, पाउडर दूध, रसवरी, राजनिवास, जिरा, तयारी सूर्ती, डिसहोमको रिसिभरलगायतका सामान रहेको प्रहरी नायव उपरीक्षक माधवराज खरेलले जानकारी दिए । बरामद भएको सामानहरु जिल्ला भन्सार कार्यालय सिरहामा बुझाइएको छ ।

जिल्ला प्रहरी कार्यालय सिरहाका अनुसार प्रहरी चौकी ठाडी, वडा प्रहरी कार्यालय सिरहा, इलाका प्रहरी कार्यालय महेशबारी र माडरबाट खटिएको प्रहरीको गस्ती टोलीले सामान बरामद गरेको हो ।