सिद्धार्थ शिशु सदनद्वारा बाढीपीडितका लागि २ लाख ५१ हजार सहयोग

न्यूज ब्यूरो, जनकपुरधाम । रसुवा जिल्लामा भदौ १० गते आएको विनाशकारी बाढी तथा प्राकृतिक विपत्तिबाट प्रभावित एवं घरविहीन परिवारको राहत तथा पुनर्स्थापनाका लागि सिद्धार्थ शिशु सदन माध्यमिक विद्यालयले २ लाख ५१ हजार रुपैयाँ सहयोग गरेको छ ।

जनकपुर एजुकेशन फाउन्डेसन प्रा.लि. अन्तर्गत सञ्चालित जनकपुरधाम–१ स्थित सिद्धार्थ शिशु सदन मा.वि. परिवारले उक्त रकम प्रधानमन्त्री दैवी प्रकोप उद्धार कोषमा जम्मा गरेको हो । विद्यालयका प्रिन्सिपल राजु यादवले सो चेक हस्तान्तरण गरेका हुन् । 

विद्यालय परिवारले विपद्को कठिन घडीमा पीडित परिवारको दुःखमा साथ दिनु सामाजिक उत्तरदायित्व र मानवीय कर्तव्य भएको जनाएको छ । सहयोगले प्रभावित परिवारको राहत तथा पुनर्स्थापनामा केही योगदान पुग्ने विश्वाससमेत विद्यालयले व्यक्त गरेको छ ।

विद्यालय परिवारले विपद्मा परेका नागरिकको सहयोगका लागि सबैलाई मानवीय हातेमालो गर्न अपिल गरेको छ ।