भोटेकोशी बाढीको बितण्डाः नुवाकोट र धादिङमा ७ जनाको लास फेला, अझै भेटिदै

न्यूज ब्यूरो, काठमान्डौँ । भोटेकोशी नदीमा आएको बाढीमा परेर बेपत्ता भएकामध्ये अहिलेसम्म ७ जनाको शव फेला परेको छ ।

बागमती प्रदेश प्रहरी प्रमुख दीपक रेग्मीका अनुसार नुवाकोट र धादिङमा गरी ७ जनाको शव फेला परेको हो । नुवाकोटको नदी किनारमा ३ जना र धादिङमा ४ जनाको शव फेला परेको प्रहरीले जनाएको छ ।

प्रदेश प्रहरी प्रमुख रेग्मीले बाढी तथा पहिरो प्रभावित क्षेत्रमा घाइतेहरूको उद्धारसँगै फेला परेका शव संकलनको काम भइरहेको जानकारी दिए ।

बाढीका कारण अझै केही व्यक्ति बेपत्ता रहेको सूचना आइरहेको प्रहरीले जनाएको छ । बेपत्ताको खोजी तथा उद्धारका लागि सुरक्षाकर्मी परिचालन गरिएको छ ।

प्रहरीका अनुसार बाढी प्रभावित क्षेत्रमा खोज तथा उद्धार कार्य जारी रहेकाले मृतकको संख्या बढ्न सक्ने अवस्था रहेको छ ।