सप्तरीमा तीन वर्षीया बालिका झाडीमा मृत फेला, शंकास्पद एक जना व्यक्ति पक्राउ

न्यूज ब्यूरो, राजविराज । सप्तरीमा तीन वर्षीया बालिका मृत फेला परेको घटनामा प्रहरीले एक जना शंकास्पद व्यक्तिलाई नियन्त्रणमा लिएर अनुसन्धान अघि बढाएको छ ।

मधेश प्रदेश प्रहरी कार्यालयका डीआईजी ओम अधिकारीले घटनामा एक जना शंकास्पद व्यक्तिलाई नियन्त्रणमा लिइएको पुष्टि गरेका छन् ।

उनका अनुसार ती व्यक्तिको गतिविधि शंकास्पद देखिएपछि नियन्त्रणमा लिएर घटनाबारे अनुसन्धान भइरहेको छ ।

सप्तरीको शम्भुनाथ नगरपालिका–३ मा स्थानीय इरफानकी तीन वर्षीया छोरी सानिया खातुन आइतबार मृत फेला परेकी हुन् ।

परिवारका अनुसार सानिया आइतबार बिहान करिब ९ बजेपछि घरबाट एकाएक बेपत्ता भएकी थिइन् । बालिका हराएको जानकारी पाएपछि परिवार तथा स्थानीयले खोजी गर्ने क्रममा घरदेखि करिब ६० मिटर पछाडिको झाडीमा उनको शव फेला परेको थियो ।

घटनाको प्रकृति र बालिकाको मृत्युको कारणबारे प्रहरीले अनुसन्धान अघि बढाएको जनाएको छ । नियन्त्रणमा लिइएका व्यक्तिसँग सोधपुछ भइरहेको र अनुसन्धानबाट घटनाको थप तथ्य खुल्ने प्रहरीले जनाएको छ ।