सप्तरीमा एआई एक्सरे प्रविधिबाट क्षयरोग पहिचानसम्बन्धी एकदिने शिविर सम्पन्न

न्यूज ब्यूरो, सप्तरी । कञ्चनरूप नगरपालिका–१२ स्थित रुपनगर स्वास्थ्य चौकीमा एआई एक्सरे प्रविधिमार्फत क्षयरोगसम्बन्धी एकदिने स्वास्थ्य शिविर सम्पन्न भएको छ ।

२०८३ साल साउन ३१ गते सञ्चालन गरिएको शिविरमा एआई एक्सरे प्रविधिको प्रयोग गरी क्षयरोगका सम्भावित तथा शंकास्पद बिरामीको प्रारम्भिक पहिचान गरिएको थियो । पहिचान भएका शंकास्पद बिरामीलाई थप एक्सरे तथा प्रयोगशाला परीक्षणका लागि आवश्यक प्रक्रिया अघि बढाइएको आयोजकले जनाएको छ ।

नेपाल सरकार, ग्लोबल फण्ड र यूएनडीपीबीचको त्रिपक्षीय साझेदारीअन्तर्गत बागमती सेवा समाज नेपालको आयोजनामा शिविर सञ्चालन गरिएको हो । संस्थाले यूएनडीपीसँगको त्रिपक्षीय सम्झौताअन्तर्गत समुदायस्तरमा क्षयरोग पहिचान, परीक्षण, उपचारका लागि सम्प्रेषण तथा जनचेतनामूलक कार्यक्रम सञ्चालन गर्दै आएको जनाएको छ ।

शिविरका क्रममा स्थानीय समुदायमा क्षयरोगका लक्षण, रोकथाम, परीक्षण तथा उपचारका विषयमा समेत जनचेतनामूलक गतिविधि सञ्चालन गरिएको थियो । एआई एक्सरे प्रविधिबाट क्षयरोगका सम्भावित बिरामीलाई प्रारम्भिक चरणमै पहिचान गरी समयमै थप परीक्षण तथा उपचारमा जोड्ने उद्देश्य रहेको आयोजकले जनाएको छ ।

शिविरमा रुपनगर स्वास्थ्य चौकीका इन्चार्ज जदुनन्दन राउत, फोकल पर्सन रामेश्वर दास, महिला स्वास्थ्य स्वयंसेविका, स्थानीय क्षयरोग समितिका अध्यक्ष मो. इनुस, सचिव सन्तोष कुमार साहलगायत स्थानीय बासिन्दाको सक्रिय सहभागिता रहेको थियो ।

यसै क्रममा तिरहुत गाउँपालिका–४ स्थित डिमन स्वास्थ्य चौकीमा यसअघि गठन गरिएको टिबी क्लबलाई थप व्यवस्थित गर्दै १३ सदस्यीय समिति गठन गरिएको जनाइएको छ । समितिमा अध्यक्ष, सचिवलगायत सदस्य चयन गरिएको छ ।

टिबी क्लबमार्फत समुदायस्तरमा क्षयरोगसम्बन्धी जनचेतना अभिवृद्धि गर्नुका साथै सम्भावित बिरामीको पहिचान तथा उपचारका लागि आवश्यक समन्वयमा सहयोग पुर्‍याउने उद्देश्य राखिएको छ ।

बागमती सेवा समाज नेपालका सप्तरी जिल्ला संयोजक दुर्गानन्द झाले सप्तरी जिल्लाका १८ वटै स्थानीय तहमा कार्यक्रम विस्तार गरिने जानकारी दिए ।

उनका अनुसार जिल्लाका प्रत्येक वडामा कम्तीमा एक स्वास्थ्य चौकीलाई लक्षित गरी एआई एक्सरे प्रविधिमार्फत क्षयरोग पहिचान तथा जनचेतनामूलक कार्यक्रम सञ्चालन गरिनेछ ।

झाले एआई एक्सरे प्रविधिको प्रयोगबाट क्षयरोगका सम्भावित बिरामीलाई प्रारम्भिक चरणमै पहिचान गर्न सहज हुने र त्यसपछि समयमै थप परीक्षण तथा उपचारमा सम्प्रेषण गर्न सकिने बताए ।

नेपाल सरकार, ग्लोबल फण्ड र यूएनडीपीको त्रिपक्षीय साझेदारीमा बागमती सेवा समाज नेपालले सप्तरीसहित समुदायस्तरमा क्षयरोग पहिचान, परीक्षण, उपचारमा सम्प्रेषण तथा रोगसम्बन्धी जनचेतना अभिवृद्धिका कार्यक्रम सञ्चालन गर्दै आएको जनाएको छ ।