लहान प्रादेशिक अस्पतालमा तत्काल ट्रमा सेवा सुरु गर्ने स्वास्थ्य मन्त्री मेहताको घोषणा

न्यूज ब्यूरो, सिरहा । स्वास्थ्य तथा खाद्य स्वच्छता मन्त्री निशा मेहताले सिरहाको लहानस्थित प्रादेशिक अस्पतालबाट तत्काल ट्रमा सेवा सञ्चालन गर्ने बताएकी छन् ।

सोमबार प्रतिनिधिसभामा उठेका प्रश्नको जवाफ दिँदै मन्त्री मेहताले धनुषाको ढल्केबरमा प्रस्तावित ट्रमा सेन्टरको योजना भने यथावत् रहेको स्पष्ट पारिन् । ढल्केबरमा तत्काल ट्रमा सेवा सञ्चालनका लागि आवश्यक पूर्वाधार पर्याप्त नभएकाले लहानमा उपलब्ध पूर्वाधार प्रयोग गरेर सेवा सुरु गर्न लागिएको उनको भनाइ छ ।

मन्त्री मेहताका अनुसार लहानस्थित प्रादेशिक अस्पतालमा सिटी स्क्यान, आवश्यक चिकित्सकीय जनशक्ति, बिरामीको पर्याप्त चाप तथा ब्लड बैंकलगायतका पूर्वाधार उपलब्ध छन् । त्यसैले नयाँ संरचना निर्माण नगरी तत्काल ट्रमा युनिट सञ्चालन गर्न लहान उपयुक्त रहेको उनले बताइन् ।

सडक दुर्घटनामा गम्भीर घाइते भएका बिरामीलाई उपचारका लागि काठमाडौं लैजानुपर्ने बाध्यता अन्त्य गर्ने उद्देश्यले ट्रमा सेवा विस्तार गर्न लागिएको मन्त्री मेहताले बताइन् ।

उनका अनुसार सरकारको नीति प्रत्येक प्रदेशमा कम्तीमा एउटा ट्रमा सेन्टर विस्तार गर्ने तथा आवश्यकता र उपलब्ध पूर्वाधारका आधारमा ट्रमा युनिट सञ्चालन गर्ने रहेको छ ।

मन्त्री मेहताले लहानमा तत्काल ट्रमा सेवा सुरु गर्ने तयारीसँगै ढल्केबरमा दीर्घकालीन रूपमा ट्रमा सेन्टर निर्माण गर्ने योजना पनि अघि बढिरहेको स्पष्ट पारिन् । ढल्केबरमा ट्रमा सेन्टर निर्माणको प्रक्रिया अगाडि बढिसकेको उनको भनाइ छ ।

नयाँ ट्रमा सेन्टर निर्माण गर्न समय लाग्ने भएकाले त्यतिन्जेल दुर्घटनामा घाइते हुने नागरिकलाई टाढा उपचारका लागि जानुपर्ने अवस्था नहोस् भन्ने उद्देश्यले लहानमा उपलब्ध पूर्वाधारबाट सेवा सुरु गर्न लागिएको मन्त्री मेहताले बताइन् ।

यसअघि ढल्केबरमा प्रस्तावित ट्रमा सेन्टर लहान सार्न खोजिएको भन्दै विभिन्न क्षेत्रबाट विरोध तथा आलोचना भएको थियो । मन्त्री मेहताको पछिल्लो स्पष्टीकरणसँगै सरकारले ढल्केबरको दीर्घकालीन योजना नहटाएको स्पष्ट पारेको छ ।

प्रादेशिक अस्पताल लहान मधेश प्रदेश सरकारअन्तर्गत सञ्चालनमा रहेको अस्पताल हो । अस्पतालको आधिकारिक विवरणअनुसार यो सिरहाको लहानमा रहेको छ ।