अब सर्लाहीको लालबन्दीमै मुटुरोग (हर्ट) सम्बन्धी उपचार सेवा सुरु

न्यूज ब्यूरो, जनकपुरधाम । सर्लाहीको लालबन्दी नगर अस्पतालमा मुटुरोगसम्बन्धी विशेषज्ञ सेवा सुरु गरिएको छ । लालबन्दी नगरपालिका, नगर अस्पताल र नेपाल हृदय रोग प्रतिष्ठान सर्लाही शाखाको समन्वयमा शनिबारदेखि विशेषज्ञ सेवा सुरु गरिएको हो ।

नगर अस्पतालका मेडिकल सुपरिटेन्डेन्ट डा. चन्दन चौधरीका अनुसार अब प्रत्येक महिनाको चौथो शनिबार मुटुरोग विशेषज्ञ डा. सुवास सुवेदीले अस्पतालबाट बिरामीलाई सेवा दिनेछन् ।

भरतपुर सरकारी अस्पतालमा कार्यरत डा. सुवेदी लालबन्दी नगरपालिका–७ डाँडाटोलका स्थानीय बासिन्दासमेत हुन् । स्थानीय मुटुरोगी उपचारका लागि टाढा जानुपर्ने बाध्यतालाई मध्यनजर गर्दै डा. सुवेदीसँग समन्वय गरी महिनामा एक दिन नियमित रूपमा सेवा उपलब्ध गराउने व्यवस्था मिलाइएको नगरप्रमुख वासुदेव अधिकारीले बताए ।

नगर अस्पतालका अनुसार उच्च रक्तचाप, हृदयाघात तथा मुटुको धड्कनमा गडबडी लगायतका समस्या भएका बिरामीले विशेषज्ञ डा. सुवेदीबाट स्वास्थ्य परीक्षण तथा उपचारसम्बन्धी परामर्श लिन सक्नेछन् ।

विशेषज्ञ सेवा लिन आउने बिरामीले ओपीडी शुल्कबापत एक सय रुपैयाँ तिर्नुपर्नेछ । आवश्यक परीक्षण गर्नुपर्ने भए नगर अस्पतालले निर्धारण गरेको शुल्कअनुसार रकम लाग्ने डा. चौधरीले बताए ।

नेपाल हृदय रोग प्रतिष्ठानका केन्द्रीय सदस्य बाबुकाजी नुच्छे प्रधानले लामो समयदेखिको प्रयासपछि मुटुरोग विशेषज्ञलाई महिनामा एक दिन भए पनि नगर अस्पतालमा नियमित सेवा दिने व्यवस्था मिलाउन सफल भएको बताए ।

शनिबार बिहान नगरप्रमुख अधिकारीको मुटु परीक्षण गरी विशेषज्ञ सेवाको औपचारिक सुरुवात गरिएको थियो । सेवा सुरु भएकै पहिलो दिन ५० जनाभन्दा बढी बिरामीले डा. सुवेदीबाट स्वास्थ्य परीक्षण तथा परामर्श लिएको नगर अस्पतालले जनाएको छ ।

महिनामा एक दिन विशेषज्ञ सेवा उपलब्ध भएपछि लालबन्दी तथा आसपासका क्षेत्रका मुटुरोगीलाई उपचार र परामर्शका लागि अन्यत्र धाउनुपर्ने बाध्यता कम हुने अपेक्षा गरिएको छ ।