.png)
न्यूज ब्यूरो, जनकपुरधाम । नयाँ आर्थिक वर्ष २०८३/८४ सुरु भएसँगै देशका अधिकांश प्रदेश सरकारले सवारीधनीलाई कर तथा जरिवानामा विशेष छुटको व्यवस्था गरेका छन् । तर मधेश प्रदेश सरकारले भने यस वर्ष पनि यस्तो कुनै व्यापक कर छुट योजना ल्याएको छैन ।
कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशले सवारी कर, नवीकरण, लगत कट्टा तथा जरिवानामा विभिन्न प्रकारका छुट घोषणा गरेका छन् । यी योजनाले लामो समयदेखि कर नतिरेका तथा नवीकरण नगरेका सवारीधनीलाई राहत दिने र सरकारको बक्यौता राजस्वसमेत उठाउन सहयोग पुग्ने अपेक्षा गरिएको छ ।
यता मधेश प्रदेश सरकारले भने २०८२ भदौमा भएको आन्दोलनका क्रममा क्षति भई सञ्चालन अयोग्य बनेका सवारी साधनका लागि मात्र विशेष व्यवस्था गरेको छ । त्यस्ता सवारीको दर्ता खारेज गर्न आगामी असोज मसान्तभित्र निवेदन दिए आर्थिक वर्ष २०८२/८३ को सवारी कर पूर्ण रूपमा मिनाहा गरिने निर्णय गरिएको छ । यसबाहेक सवारी कर वा नवीकरण जरिवानामा कुनै विशेष छुटको व्यवस्था गरिएको छैन ।
अन्य प्रदेशहरूले भने फरक–फरक प्रकृतिका सहुलियत घोषणा गरेका छन् । लुम्बिनी प्रदेशले आगामी पुस मसान्तसम्म कर बुझाएर नवीकरण गर्न आउने सवारीधनीलाई जरिवानामा ५० प्रतिशत छुट दिएको छ भने सुदूरपश्चिम प्रदेशले पाँच वर्ष वा सोभन्दा बढी समयदेखि कर नतिरेका सवारीका लागि कर तथा नवीकरण जरिवाना पूर्ण रूपमा मिनाहा गर्ने व्यवस्था गरेको छ ।
कोशी प्रदेशले पाँच वर्षभन्दा बढी कर बाँकी रहेका सवारीधनीले पछिल्लो एक आर्थिक वर्षको कर मात्र बुझाए बाँकी कर तथा जरिवाना मिनाहा गर्ने नीति लिएको छ । बागमती, गण्डकी, लुम्बिनी र कर्णाली प्रदेशले पनि पुराना वा सञ्चालनमा नरहेका सवारीको लगत कट्टालाई सहज बनाउन कर तथा जरिवानामा विभिन्न प्रकारका छुटको व्यवस्था गरेका छन् ।
त्यस्तै, कोशी प्रदेशले विद्यार्थी, ज्येष्ठ नागरिक र अपाङ्गता भएका व्यक्तिलाई सहुलियत दरमा सेवा दिने सार्वजनिक सवारीलाई सवारी करमा ६० प्रतिशत छुट दिने व्यवस्था गरेको छ भने कर्णाली प्रदेशले पाँच वर्षको सवारी कर एकमुष्ट अग्रिम भुक्तानी गर्ने सवारीधनीलाई २० प्रतिशत कर छुट दिने आकर्षक योजना सार्वजनिक गरेको छ ।
देशका अधिकांश प्रदेशले सवारीधनीलाई राहत दिने नीति अघि सारेका बेला मधेश प्रदेश सरकारले भने सीमित अवस्थाबाहेक कुनै व्यापक कर छुट नल्याएकाले सवारीधनीहरू निराश बनेका छन्।
तराईको गर्मीमा आँखाको हेरचाह कसरी गर्ने ?
- २०८३ श्रावण २ शनिबार
न्यूज ब्यूरो, जनकपुरधाम । बढ्दो प्रदूषण, विश्व तापमानमा वृद्धिजस्ता कारण गर्मी मौसममा आँखामा विभिन्न संक्रमण देखा पर्ने गरेको छ। संक्रमण हुँदा समयमै ख्याल नगरे आँखाको दृष्टि नै गुम्न सक्छ । गर्मीका
पूरा पढ्नुहोस्
