कथित नमुना माविमा प्रअ पवन मण्डलको करामतः सरकारबाट लाखौँ लिएको प्रमाण फेला, विद्यार्थीलाई पनि लुटे !

न्यूज ब्यूरो, जनकपुरधाम । धनुषाको कथित नमुना मावि गिद्धाबेलापट्टि स्कूलमा अतिरिक्त कक्षा (कोचिँग) को नाममा सरकारबाट लाखौ लिएको प्रमाण फेला परेको छ ।

आफूलाई नमुना भनेर समाजिक सँजालमा प्रचार गरिएको माध्यमिक विद्यालय गिद्धाबेलापट्टिको खातामा स्थानीय सरकारले अतिरिक्त कक्षा (कोचिँग) पढाएको वापत ४ लाख ४० हजार रुपैयाँ पठाएको प्रमाण फेला परेको छ । यो रकम मात्र एक आर्थिक बर्षको लागि देखिएको छ ।

महालेखा परीक्षकको सरकारी प्रतिवेदनमा बुँदा नं. ७६ मा विदेह नगरपालिकाको कार्यालयबाट अतिरिक्त कक्षाको नाममा ४,४०,०००। रुपैयाँ भुक्तानी लिएको खुलाइएको छ । प्रतिवेदन अनुसार सो रकम लिएपनि अतिरिक्त कक्षा सँचालन गरी शिक्षकलाई दिएको प्रमाण पेश गर्न नसकेपछि असुल उपर गर्न भनिएको हो ।

विद्यालयले अतिरिक्त कक्षा सञ्चालन गरी शिक्षकलाई भुक्तानी दिएको जनाएको भए पनि शिक्षकहरूको अतिरिक्त कक्षा लिएको हाजिरी तथा अन्य पुष्टि हुने अभिलेख पेश नगरेकाले कक्षा वास्तविक रूपमा सञ्चालन भएको र भुक्तानी यथार्थ रहेकोमा आश्वस्त हुन नसकिने महालेखाको ठहर छ।

प्रतिवेदनले नगरपालिकाको शिक्षा शाखासमेतको सहभागितामा घटनाको यथार्थ छानबिन गरी प्रतिवेदन पेश गर्न तथा अनियमितता पुष्टि भए सम्बन्धित व्यक्तिबाट रकम असुलउपर गरी राजस्व दाखिला गर्न निर्देशन दिएको छ ।

विद्यार्थीबाट पनि लाखौँ असुली
सोही विद्यालयमा बलपूर्वक कोचिँग पढनैपर्ने बाध्यतात्मक स्थिति सृजना गरेका प्रअ पवन मण्डल, तत्कालिन व्यवस्थापन समितिले विद्यार्थीबाट लाखौँ लाख रुपैयाँ असुलेको प्रमाण पनि फेला परेको छ । विद्यालयमा करिब आधा विद्यार्थी नक्कली सँख्या देखाएर गरिब, दलित, विपन्नको लागि आउने छात्रवृतिसहित अन्य सेवासुविधा झ्वाम्म पारेका प्रअ मण्डलले कोचिँग कक्षाको नाममा सरकारबाट लिएर विद्यार्थीबाट पनि असुलेको पाईएको छ ।

विद्यार्थीहरुबाट प्रति महिना रु. ७ सय देखि १ हजारसम्म असुलेको बिल प्रमाण भेटिएको छ । कोचिँग पढने ९५ प्रतिशत विद्यार्थीलाई कुनै बिल, रसिद नदिएको गुनासो विद्यार्थीहरुको छ । केहीले जबरदस्ती बिल मागेपछि चन्दा शुल्क भनेर बिल काटिएको पाईएको हो ।

जानकारी अनुसार, सो विद्यालयका लगभग सबै विद्यार्थी सोही विद्यालयमा कोचिँग पढनुपर्ने बाध्यता सृजना गरेपछि सो अनुसार प्रत्येक विद्यार्थीबाट महिनाको औसत ८५० रुपैयाँ असुलेपनि लाखौँ लाख रुपैयाँ असुलिएको अनुमान गरिएको हो । विद्यार्थीहरुबाट सहुलियत रकम लिएर कोचिँग चलाएको स्वीकार प्रअ मण्डलले आफँ दिएको एक अन्तरवार्तामा गरिसकेका छन् ।

सरकारले सरकारी विद्यालयमा अतिरिक्त कक्षा पूर्ण रुपमा निःशुल्क चलाउनुपर्ने नियम भएपनि प्रअ मण्डलले विद्यार्थीहरुबाट अतिरिक्त कक्षाको नाममा रकम असुलेको फेला परेको हो । यसरी सरकारबाट पनि र विद्यार्थीबाट गरी दुवै तर्फबाट रकम असुलिएको पाईएको हो ।

जानकारी अनुसार, प्रअ मण्डलले नगरपालिकाको बिना अनुमति आफूखुसी असुली गर्न विद्यालयमा कोचिँग सँचालन गरेको हो । मण्डलले गरिब, दलित, विपन्नलाई झन आर्थिक भार दिएर प्रताडित गरेको आरोप छ ।

यस सन्दर्भमा प्रअ मण्डलको मोबाईलमा सम्पर्क गर्न खोज्दा उनको मोबाईल स्वीच अफ आयो ।