जनकपुरका मेयर साहको अथक प्रयासले जनकपुरधाममा २ अर्बभन्दा बढीको ऐतिहासिक शहरी विकास योजना

न्यूज ब्यूरो, जनकपुरधाम । मधेश प्रदेशको राजधानी तथा धार्मिक–पर्यटकीय महत्व बोकेको जनकपुरधाम उपमहानगरपालिकाले शहरी पूर्वाधार विकासमा ऐतिहासिक फड्को मारेको छ । जनकपुरधामका मेयर मनोज कुमार साहको दुई वर्ष लामो निरन्तर मेहनत, पहल र दूरदर्शी नेतृत्वका कारण बहुप्रतीक्षित ‘अर्बन रेजिलियन्स एण्ड लिभेबिलिटी इम्प्रुभमेन्ट प्रोजेक्ट (यूआरएलआईपी परियोजना)’ अन्तर्गत करिब २ अर्ब १३ करोड रुपैयाँ बराबरको विशाल विकास योजना अघि बढेको हो ।

नेपाल सरकार र एशियन विकास बैंक (एडीबी) को आर्थिक ऋण सहयोगमा सञ्चालन हुन लागेको यो महत्वाकांक्षी परियोजनाले जनकपुरधामको मुहार नै फेरिने विश्वास गरिएको छ । वर्षौंदेखि जलजमाव, अव्यवस्थित सडक, हिलाम्य अवस्था, फुटपाथ अभाव र कमजोर ढल निकास समस्याबाट पीडित जनकपुरधाम अब आधुनिक, व्यवस्थित र सुरक्षित शहरतर्फ अघि बढ्न लागेको हो ।

मेयर मनोज कुमार साहले कार्यभार सम्हालेदेखि नै जनकपुरधामको दीर्घकालीन शहरी विकासलाई प्राथमिकतामा राख्दै संघीय सरकार, एडीबी तथा विभिन्न निकायसँग निरन्तर समन्वय गर्दै आएका थिए । सोही अथक प्रयासको प्रतिफलस्वरूप अहिले अन्तर्राष्ट्रिय स्तरको बोलपत्र आह्वान भइसकेको छ । पहिलो चरण अन्तर्गत करिब १ अर्ब ६५ करोड रुपैयाँ बराबरको टेन्डर आह्वान गरिएको छ भने थप करिब ५० करोड रुपैयाँ बराबरको अर्को प्याकेज पनि छिट्टै सार्वजनिक हुने तयारीमा रहेको छ ।

मेयर साहका अनुसार परियोजना अन्तर्गत परिक्रमा सडकको भ्रमरपुरा चौकदेखि पिराडी चोकसम्म, आँखा अस्पतालदेखि मणि मण्डप जाने सडक, रामानन्द चोकदेखि कुर्थासम्म, विसविट्टीदेखि कुर्थासम्म, मोनाष्टिक स्कूलदेखि पुल चोक जाने सडक, सीता चोकदेखि पुल चोक जाने सडक, विद्यापति चोकदेखि मटकोरवा पोखरी जाने सडक, कुवादेखि रामपुर जाने सडक तथा पुल चोकदेखि हुलाकी सडक जोड्ने सडक लगायतका महत्वपूर्ण सडकहरू निर्माण हुनेछन् ।

परियोजनामा सडक मात्र नभई आधुनिक नाला प्रणाली, सुरक्षित फुटपाथ, रोड फर्निचर, स्मार्ट सडक बत्ती तथा खानेपानी जडानसमेत समावेश गरिएको छ । यसले जनकपुरधामलाई केवल धार्मिक शहर मात्र नभई आधुनिक र व्यवस्थित महानगरीय स्वरूप दिने अपेक्षा गरिएको छ ।

विगतमा जनकपुरधाममा विकास आयोजनाहरू जग्गा अधिग्रहण विवादका कारण रोकिएको इतिहास रहे पनि यस पटक मेयर साहले त्यसलाई प्रमुख चुनौतीको रूपमा लिँदै सुरुदेखि नै व्यापक तयारी गरेका थिए । मेयर साहले भने, “यस पटक कुनै समस्या आउँदैन । हामी दुई वर्षदेखि त्यसैको तयारीमा थियौं । हरेक घरधनी र जग्गाधनीसँग स्वीकृति लिइसकेका छौं ।”

उनको यही दूरदर्शिता र व्यवस्थापन क्षमताको प्रशंसा अहिले नगरवासीहरूले खुलेर गर्न थालेका छन् । स्थानीयवासीहरूका अनुसार मेयर साहले केवल योजना ल्याउने काम मात्र नगरी त्यसको कार्यान्वयन सुनिश्चित गर्न आवश्यक सम्पूर्ण आधार तयार पारेका छन् ।

परियोजना कार्यान्वयन इकाई (पीआईयू) जनकपुरधामद्वारा जारी सूचनाअनुसार अन्तर्राष्ट्रिय स्तरका अनुभवी निर्माण कम्पनीहरूलाई मात्र प्रतिस्पर्धामा सहभागी गराइनेछ । न्यूनतम ९.४१७ मिलियन अमेरिकी डलर वार्षिक कारोबार भएका तथा ठूला सडक आयोजना सम्पन्न गरिसकेका कम्पनीहरू मात्र योग्य हुने व्यवस्था गरिएको छ । साथै ०.१८८ मिलियन अमेरिकी डलर बराबरको बिड सेक्युरिटी राख्नुपर्ने प्रावधान पनि तोकिएको छ । बोलपत्र पेश गर्ने अन्तिम मिति ७ जुलाई २०२६ निर्धारण गरिएको छ ।

मेयर मनोज कुमार साहले आगामी आर्थिक वर्षको भदौ महिनासम्म निर्माण कार्य सुरु भइसक्ने जानकारी दिएका छन् । उनले जनकपुरधामलाई आधुनिक, सुरक्षित, व्यवस्थित र पर्यटकमैत्री शहर बनाउने आफ्नो प्रतिबद्धता दोहोर्‍याएका छन् ।

शहरी विकास विज्ञहरूका अनुसार यदि यो परियोजना पारदर्शी र प्रभावकारी रूपमा कार्यान्वयन भयो भने जनकपुरधामको विकास इतिहासमा यो सबैभन्दा ठूलो उपलब्धि सावित हुनेछ । वैज्ञानिक ड्रेनेज प्रणाली, सुरक्षित पैदलमार्ग, गुणस्तरीय सडक र आधुनिक शहरी पूर्वाधारले जनकपुरधामलाई मधेश प्रदेशकै नमूना शहरका रूपमा स्थापित गर्न सक्ने विश्वास गरिएको छ ।

मेयर मनोज कुमार साहको नेतृत्व, निरन्तर सक्रियता र विकासप्रतिको दृढ प्रतिबद्धताका कारण अहिले जनकपुरधाम विकासको नयाँ युगतर्फ अग्रसर भएको स्थानीयवासीहरूको भनाइ छ । उनीहरूले यो परियोजनालाई जनकपुरधामको भविष्य बदल्ने “गेम चेन्जर” योजनाका रूपमा हेरेका छन् ।