जनकपुर प्रादेशिक अस्पतालमा डाक्टरहरुको पेनडाउनले विरामीहरुलाई सास्ती, अझै खुलेन उपचार

न्यूज ब्यूरो, जनकपुरधाम । गरिब विरामीहरुको सँख्या बढी भएको प्रादेशिक अस्पताल जनकपुरको विभिन्न वार्डहरु बन्द गरिएपछि विरामीहरुमा हलचल मचेको छ । 

एक सुत्केरी महिलाको उपचारको क्रममा मृत्यू भएपछि दोष डाक्टरलाई दिँदै निलम्बन गर्न माग गरेपछि सो अस्पतालमा कार्यरत डाक्टरहरुले समेत आन्दोलन सुरु गरेका छन् । उनीहरु विगत तीनदिनदेखि पेनडाउन गरेपछि ओपिडी सेवा प्रभावित बनेको हो । यसले सयौँ गरिब, निमुखा बिरामीहरुलाई सास्ती भएको छ । उपचार, चेकजाँच नपाउँदा उनीहरुमा बिच्चली भएको छ । 

अस्पताल जस्तो संवेदनशिल क्षेत्रमा यस्ता आन्दोलनले चिकित्सकमाथिको भरोसा समेत न्यून भएको छ भने उपचारको क्रममा हुने मृत्यूलाई डाक्टरकै लापरवाहीसँग जोडने प्रवृतिपछि संंवेदनशिलता भँग हुँदै गएको छ । विरामीहरुले ओपिडी टिकट कटाउने, उपचारका लागि लाम बस्ने, उपचार हुने आसमा बस्ने गर्दा अस्पतालमा भीडभाड भएको छ भने अझै उपचार पाउन सकेको छैन् । 

एक प्रसुति महिलाको शल्यक्रियापछि उपचारको क्रममा मृत्यू हूँदा परिवारजनले शल्यक्रियामा संलग्न दुई चिकित्सकलाई निलम्बनको माग राख्दा अस्पताल प्रशासनले निलम्बन गर्दा अन्य डाक्टर, कर्मचारीहरुले पेन डाउन गरिदिएपछि गम्भिर अवस्था सृजना भएको छ । 

यद्यपी, दुवै पक्षबीच सम्झौता भईसकेपनि डाक्टरहरुको पेनडाउन भएको कारण अवस्था तनावमय बनेको छ । यसलाई चिकित्सकहरुले नीजि अस्पतालमा विरामी पठाउने षडयन्त्र भन्दै केही विरामीका आफन्तले आक्रोस समेत पोखेका छन् ।