इन्जिनियर रामबाबु साहको असुली आतङ्क, खोटाङ सरुवा भए पनि रौतहटमै अवैध असुलीमा व्यस्त

संजय सहनी, ​रौतहट । जिल्ला समन्वय समिति रौतहटका इन्जिनियर रामबाबु साहले अनुचित लेनदेन र कमिसन नपाएपछि जिल्लाका क्रसर तथा टिपर व्यवसायीहरूलाई त्रसित बनाउन थालेका छन्।

लामो समय पूर्वाधार कार्यालय रौतहटमा कार्यरत रही केही महिनाअघि मात्रै जिल्ला समन्वय समितिमा सरुवा भएका साहले वैध रूपमा सञ्चालित व्यवसायमाथि समेत गिद्धे नजर लगाएको आरोप लागेको छ।

​स्थानीय व्यवसायी र नागरिकहरूका अनुसार इन्जिनियर साहले विभिन्न क्रसर उद्योगहरूमा आफ्ना प्रतिनिधि खटाएर अनुगमनको नाममा मोटो रकम बार्गेनिङ गर्ने गरेका छन्।

मागबमोजिमको रकम नदिए प्रहरी प्रशासनलाई प्रभावमा पारी भ्याट बिल सहितका वैध गिटी(बालुवा बोकेका ट्रक, टिपर र ट्याक्टरहरूलाई बाटोमै रोकेर दुःख दिने र अन्ततः आफ्नो कार्यालयमा पुर्‍याएर ३० देखि ५० हजार रुपैयाँसम्म गैरकानुनी जरिवाना तिराउने गरेको आरोप उनीमाथि छ।

​पूर्वाधार कार्यालय रौतहटमा रहँदा नै व्यापक अनियमितता गरी गौर, वीरगन्ज र काठमाडौँ जस्ता प्रमुख शहरहरूमा अकुत सम्पत्ति आर्जन गरेको आरोप खेपिरहेका साहले हाल जिल्ला समन्वय समितिलाई नै भ्रष्टाचारको अखडा बनाएको स्थानीयको भनाइ छ। यसरी उठाइने अवैध कमिसनको हिस्सा समन्वय समितिका सभापतिदेखि कार्यालय प्रमुखसम्म पुग्ने गरेकोले नै उनको मनोबल बढेको स्रोतको दाबी छ।

​भ्रष्टाचार र अनियमिततामा लिप्त इन्जिनियर साहको जिल्ला समन्वय समिति खोटाङ्गमा सरुवा भएता पनि मन्त्रालय सङ सेटिङ्ग मिलाएर अवैध कमाइको लोभमा रौतहट समन्वय समितिमा डेरा जमाएको आरोप छ। कानुनको खिल्ली उडाउँदै जबरजस्ती रौतहटमै बसेर असुली धन्दा चलाइरहँदा समेत सम्बन्धित माथिल्लो निकाय र नियामक संस्था मौन रहनुले थप आशंका उब्जाएको छ। व्यवसायीहरूले यस्ता भ्रष्ट कर्मचारीमाथि तत्काल छानबिन गरी कडा कारबाही गर्न माग गरेका छन्।

अर्को तर्फ ईन्जिनियर साह आफुले जिवनमा कुनै आर्थिक अनियमितता नगरेको दाबी गरेका छन् ।