काठमान्डौँमा वृद्ध यात्रुमाथि हातपात गर्ने बस कन्डक्टर पक्राउ !

न्यूज ब्यूरो, जनकपुरधाम । सार्वजनिक यातायातमा यात्रुमाथि दुर्व्यवहार गरेको आरोपमा ट्राफिक प्रहरीले एक सहचालकलाई पक्राउ गरेको छ ।

पक्राउ पर्नेमा भोजपुर साल्पासिलिचो गाउँपालिका–४ घर भई हाल काठमाडौंको सुकेधारा बस्दै आएका २६ वर्षीय कुशाङ्ग शेर्पा रहेका छन् । उनी बा ५ ख ६८४० नम्बरको यात्रुवाहक बसमा सहचालकका रूपमा कार्यरत थिए ।

उपत्यका ट्राफिक प्रहरी कार्यालयका अनुसार वैशाख २६ गते ललितपुरको एकान्तकुना सडक खण्डमा भाडाको विषयमा यात्रुसँग विवाद हुँदा शेर्पाले अभद्र व्यवहार गर्नुका साथै हातपात गरेका थिए । घटनापछि सर्वसाधारणले विरोध जनाएका थिए ।

घटनाको जानकारी प्राप्त भएपछि ट्राफिक प्रहरीले शेर्पालाई नियन्त्रणमा लिएको जनाएको छ । उनलाई थप अनुसन्धान तथा कारबाहीका लागि जिल्ला प्रहरी परिसर ललितपुर पठाइएको प्रहरीले जनाएको छ ।

ट्राफिक प्रहरीले सार्वजनिक यातायात क्षेत्रमा यात्रुमाथि हुने दुर्व्यवहार र अराजक गतिविधिप्रति शून्य सहनशीलताको नीति अपनाइएको जनाएको छ । यात्रुको सुरक्षा, सम्मान र सहज आवतजावत सुनिश्चित गर्न यस्ता गतिविधिमा संलग्न व्यक्तिमाथि कडा कारबाही गरिने प्रहरीको भनाइ छ ।