जनमतले समर्थन फिर्ता लिएपनि मुख्यमन्त्रीसँग बहुमत कायमै, जसपाले धोका नदिए पद हुन सक्छ धरापमा

न्यूज ब्यूरो, जनकपुरधाम । मधेश प्रदेश सरकारलाई दिएको समर्थन जनमत पार्टीले फिर्ता लिए पनि सरकारको बहुमत कायमै रहेको छ। प्रदेश प्रमुखको कार्यालयले बुधबार जारी गरेको विज्ञप्तिमा जनमत पार्टीले वैशाख २२ गतेदेखि लागू हुने गरी समर्थन फिर्ता लिएको उल्लेख गरिएको छ।

प्रदेश प्रमुखको कार्यालयका शाखा अधिकृत कृष्ण ठाकुरद्वारा जारी विज्ञप्तिअनुसार संविधानको धारा १६८ (२) बमोजिम गठन भएको वर्तमान सरकारबाट जनमत पार्टी बाहिरिएको हो। जनमत पार्टीका संसदीय दलका नेता चन्दन सिंहसहितका प्रदेशसभा सदस्यहरूले सोही मितिमा समर्थन फिर्ता लिएको पत्र दर्ता गराएका थिए।

प्रदेश प्रमुखको कार्यालयका सचिव नारायणप्रसाद दहालका अनुसार समर्थन फिर्ता लिइएपछि मुख्यमन्त्री कृष्णप्रसाद यादव नेतृत्वको सरकारले ३० दिनभित्र विश्वासको मत लिनुपर्ने संवैधानिक व्यवस्था छ। कानुनअनुसार सरकारमा सहभागी कुनै दलले समर्थन फिर्ता लिँदा निर्धारित समयभित्र विश्वासको मत लिनुपर्ने हुन्छ।

यद्यपि, जनमत पार्टी बाहिरिए पनि सरकारसँग बहुमत कायम रहेको छ। १०२ सदस्यीय प्रदेशसभामा बहुमतका लागि ५२ सांसद आवश्यक पर्छ। हाल मुख्यमन्त्री यादवलाई नेपाली कांग्रेसका २२, जसपा नेपालका १८, नेकपाका १५ र लोसपा नेपालका ८ गरी पर्याप्त समर्थन रहेको छ।

सरकारबाहेक रहेका दलमध्ये नेकपा (एमाले) र नेपाल संघीय समाजवादी पार्टीले समेत सरकारलाई समर्थन जनाउँदै आएका छन्। जनमत पार्टीको समर्थन फिर्तापछि प्रदेशको राजनीतिक गतिविधि तीव्र बनेको छ। सरकार टिकाउने वा गिराउने विषयमा विभिन्न दलबीच छलफल र दौडधुप बढे पनि एमाले संसदीय दलका नेता सरोज यादवले आफूहरू सरकार बनाउने वा गिराउने खेलमा संलग्न नहुने बताएका छन्।