गृहमन्त्री सुधन गुरुङलाई तत्काल बर्खास्त गर्न माग

काठमाडौं | Gen Z Movement Nepal ले गृहमन्त्री सुधन गुरुङ्गमाथि लागेको गम्भीर आरोपको निष्पक्ष छानबिनका लागि उनलाई तत्काल पदबाट हटाउन सरकारसँग कडा माग गरेको छ। सोमबार प्रवक्ता Bijay Shah ले जारी गरेको प्रेस वक्तव्यमा स्पष्ट भनिएको छ- 'मन्त्री पदमा बसिरहँदा अनुसन्धान निष्पक्ष हुनै सक्दैन, यो सीधा स्वार्थको द्वन्द्व हो।'

मुभमेन्टले औंल्याएको छ कि सत्तामा बसेकै अवस्थामा आफ्नैविरुद्ध छानबिन हुनु आधारभूत नैतिकता र कानुनी सिद्धान्तकै उल्लंघन हो। “निष्पक्ष न्याय चाहिन्छ भने पदत्याग अनिवार्य छ,” वक्तव्यमा जोड दिइएको छ।

सरकारमाथि पनि मुभमेन्टले सीधा प्रश्न उठाएको छ। बालेन्द्र शाह नेतृत्वको सरकारलाई लक्षित गर्दै भनिएको छ-'मन्त्री नियुक्ति र बर्खास्तीलाई खेल नबनाइयोस्। क्याबिनेटमा कसलाई राख्ने भन्ने विषय गम्भीर राजनीतिक र नैतिक निर्णय भएकाले जिम्मेवार नेतृत्वले परिपक्वता र जवाफदेहिता देखाउनुपर्ने मुभमेन्टको अडान छ।'

“यो साधारण सरकार होइन, ७६ जना शहीदको रगतबाट आएको जनादेशको प्रतिनिधित्व हो। जनताको बलिदानमाथि सस्तो राजनीति स्वीकार्य छैन।” सुशासन, पारदर्शिता र जवाफदेहितामा कुनै सम्झौता नहुने चेतावनी पनि दिइएको छ।

उता विवादको जरो भने अझ गहिरो छ। विवादास्पद व्यापारी दिपक भट्टसँग गुरुङको साझेदारी रहेको विषय बाहिरिएपछि मन्त्री गुरुङमाथि प्रश्नहरू थप चर्किएका छन्। अब नजर सरकारतर्फ छ| माग अनुसार कदम चालिन्छ कि राजनीतिक दबाबमै विषय थामिन्छ? भनेर प्रश्न गरिएको छ ।