एक सातादेखि हराएकी धनुषाकी श्रृष्टि भारतको लखनउमा फेला !

न्यूज ब्यूरो, जनकपुरधाम । विगत एक सातादेखि हराएकी धनुषाकी एक किशोरी भारत उत्तर प्रदेशको लखनउमा फेला परेकी छन् ।

गत बुधबारदेखि नै हराएकी धनुषाको क्षीरेश्वरनाथ नगरपालिका वडा नं. ९ ईच्छापुरस्थित जलाद पुल नजिकै पसल रहेको गणेश प्रसाद ढुँगेलकी १३ बर्षिय छोरी श्रृष्टि ढुँगेल लखनउमा फेला परेकी हुन् ।

घरबाट सम्पर्कविहिन भएपछि उनको खोजविन थालिएको थियो । सो क्रममा न्यूज ब्यूरोको अफिसियल पेजमा समेत उनको हराएको सूचना राखिएपछि उनलाई देख्नेहरुले सम्पर्क गरेपछि खोजबिन तीव्र पारिएको थियो ।

श्रृष्टिको पसल रहेको ईच्छापुरको समुदायिक विद्यालय र जलाद नदीको निर्माणधीन पुलभन्दा पूर्व तथा दुईमुखे बाटोस्थित एक ईटा भट्टामा काम गर्ने युवकले उनलाई ललाई फकाई भारत लगेको खुलेको छ ।

ईटा भट्टामा काम गर्ने भारत युपीकै अँकित बर्मा नामक युवकले उनलाई प्रलोभनमा पारी भारत लगेको खुलेको छ । अँकितका साथीले समेत उनलाई भारत लगेको बयान दिएपछि धनुषा प्रहरीले एक्सन लिएको थियो ।

ईलाका प्रहरी कार्यालय धनुषाधाममा अभिभावकले चढाएको निवेदनमा अंकित बर्मा र उनका साथीलाई कारवाहीको माग गरिएको छ । मात्र १३ बर्षकी श्रृष्टि अहिले धनुषाधाम नगरपालिका वडा नं. ५ पर्वतामा बस्दै आएकी हुन् । उनी आफ्नै घरबाट गएको खुलेको छ ।

खोजबिन र उनको साथीबाट सूचना प्रवाह भएपछि धनुषा प्रहरीले भारतीय प्रहरीसँगको समन्वयमा उनलाई सुरक्षित पारेको बताईएको छ । अहिले लखनउमा उनका अभिभावकहरु उनलाई लिन पुगेका छन् भने भोली उनी घर आउन लागेकी बताईएको छ ।