धनुषामा मोसासहित पुलबाट खसेर दुई युवकको मृत्यू, कसैले ठक्कर दिएर मारेको आशंका 

न्यूज ब्यूरो, जनकपुरधाम । धनुषामा मोटरसाईकल दुर्घटनामा परी दुई युवकको मृत्यू भएको छ । धनुषाधाम नगरपालिका वडा नं. ३ धनुष मन्दिरको पूर्वमा रहेको पुलबाट खसेर मृत्यू भएको हो । 

घटना गत मँगलबार साँझकै रहेको प्रहरीले जनाएको छ । मँगलबार साँझ करिब ८ः०० बजेको समयमा प्रदेश २ ००७ प ६९४६ नम्बरको मोटरसाईक दुर्घटना हुँदा दुई युवकको घटनास्थलमै मृत्यू भएको हो । 

मृत्यू हुनेमा धनुषा क्षीरेश्वरनाथ नगरपालिका वडा नं. ५ महेन्द्रनगर बस्ने स्थानीय श्रवनारायण ठाकुरका अन्दाजी २५ बर्षिय छोरा रामभरोस ठाकुर र सोही स्थान बस्ने स्थानीय राम सुगारथ साहका छोरा २८ बर्षिय दिनेश साहको घटनास्थलमै मृत्यू भएको हो । 

धनुषाको मखनाहादेखि धनुषाधामतर्फ आउँदै गरेको सो मोसा बालगँगा पुलबाट तल झरेको ईलाका प्रहरी कार्यालय धनुषाधामले जनाएको छ । उनीहरु मदिरा सेवनको कारण सवारी अनियन्त्रित भएर दुर्घटना भएको हुन सक्ने प्रहरीको भनाई छ । 

यता, परिवारजनलाई भने कसैले विपरित दिशाबाट ठक्कर दिएको हुन सक्ने आशंका भएकोले सोही अनुसार छानबिन गरिदिन आग्रह गरेका छन् । 

करिब दुई बर्षअघि मात्र बिहे गरेको रामभरोस मात्र १५ दिन अगाडी विदेशबाट आएका थिए । घुम्नको  लागि बाहिर निस्केका दुवै जनाको मोटरसाईकल दुर्घटनामा परी मृत्यू भएपछि सिँगो टोल शोकमग्न भएको छ । रामभरोस र दिनेशको श्रीमति विधवा भएकी छन् । 

मृतक रामभरोसका दाई पर्ने रामदिनेश शर्माले प्रहरीलाई नयाँ शिराबाट अनुसन्धानको गरिदिन आग्रह गरेका छन् । उनले कसैले ठक्कर दिएको हुन सक्ने भन्दै विभिन्न स्थानको सिसिटिभी मार्फत अनुसन्धान गर्न आग्रह गरेका हुन् ।