नीधि को विरोधमा उत्रे वडाध्यक्षहरु, नगराईन नपामा तालाबन्दी !

न्यूज ब्यूरो |
जनकपुरधाम, ११ साउन । धनुषाको नगराईन नगरपालिकाको कार्यालयमा तालाबन्दी गरिएको छ ।

नगराईन नगरपालिकाको नाम परिवर्तन गरी नेपाली काँग्रेसका नेता विमलेन्द्र निधिका बुवा महेन्द्र नारायण निधिको नाममा नामाकरण गरिन लागिएको भन्दै तालाबन्दी गरिएको हो । शुक्रवार नगराईन नगरपालिकाका चारजना वडा अध्यक्ष सहित १६ जना सदस्यहरुले नामाकरणमा विरोध जनाउँदै मूल गेटमा तालाबन्दी गरेका छन ।

शुक्रवार नगरपालिकाकै कार्यपरिसरमा पत्रकार सम्मेलनको आयोजना गरी वडा नं. ४ का वडा अध्यक्ष अमिरी लाल राउतले आफु अक्षर जान्न नसक्ने भएकाले विभिन्न कार्यक्रममा आवत जावत तथा भत्ताको रकम बुझ्न सही भन्दै गराएको तर अहिले आएर नगरपालिकाको नाम परिवर्तनका लागि झुक्याएर आफुसँग सहीछाप गराएको आरोप लगाए ।

उनले भने, ‘मलाई तपाईको बैठक भत्ता वापतको रकम ७ हजार ५ सय भयो लिनुस् अनि यहाँ सहीछाप गर्नुस् भनेर लगाईयो, म आफु पढेलेखेको छैन, अक्षर चिन्दिन पछि बुझ्दै जाँदा नाम परिवर्तनको कागजमा पो सही गराएको रहेछ, त्यही आएर नगरवासीको भ्रम हटाउन तथा निर्णय बदरको माग लागि बाध्य भएर तालाबन्दी गर्नुपरेको छ ।’

यसैगरी वडा नं. ८ का वडा अध्यक्ष संजय कुमार राउतले विमलेन्द्र निधिका बुवा महेन्द्र नारायण निधिको नाममा धैरै शालिका तथा संघ संस्थाहरु स्थापना भैसकेकोले अब शहिद दुर्गानन्द झाको नाममा हुनुपर्ने अडान राखे ।

यसैगरी नगराईन नगरपालिकाकै वडा नम्बर १ का वडा अध्यक्ष प्रमोद साहले नगरपालिकाका मेयर परमेश्वर साहले गलत मनसायले एकलौटी रुपमा नाम परिवर्तन गर्दा आफुहरुले विरोध जनाएको बताए ।

उनले भने, ‘जनकपुरधाममा राजा महेन्द्र आएको बेला बम प्रहार गरेर जहानिया शासन विरुद्ध लडेका शहिद दुर्गानन्द झाको नाममा नगरपालिकाको नामकरण हुनुपर्छ ।”

यसैगरी अर्को वडा नं. ७ का वडा अध्यक्ष रामदुलार मुखियाले भने, ‘यहाँको जति पनि सरकारी संघ संस्था हुन्छ, त्यो विमलेन्द्र निधिकै बुवा र हजुरबुवाको नाममा हुनुपर्छ भनि हामीलाई स्विकार्य छैन, हामीले शहिद दुर्गानन्द झा,डा.लक्ष्मीनारायण झा,जमुनिया,सिता लगायतका नाममा पनि नामाकरण गर्न सकिन्छ, तर एउटै व्यक्तिको नाममा कति संघसंस्थालाई नामाकरण गर्ने ?’ भनेर प्रश्न गरेका छन ।

नगरपालिकाका मेयर परमेश्वर यादवले गएको असार २० गते भएको नगरपरिषदकै क्रममा गोप्य रुपमा नाम परिवर्तन गर्ने प्रस्ताव अघि प्रक्रिया अघि बढाएको तर छलफलमा नल्याएको वडाध्यक्ष मुखियाले बताए ।

रामदुलार मुखिया,वडा अध्यक्ष,वडा नं.७, नगराईन नगरपालिका
तालाबन्दी गर्ने क्रममा प्रहरीले अवरोध गरेपछि केहीबेर प्रहरीसँग धक्कामुक्की समेत भएको थियो । वडाध्यक्षलगायत स्थानीयहरुले प्रहरीलाई धकेलेर हटाउँदै तालाबन्दी गरेका थिए ।

नगराईन नगरपालिकामा नेपाली काँग्रसबाट मेयर विजयी भएका छन् । ९ वटा वडा मध्ये ५ वटा वडामा काँग्रेस विजयी भएको छ भने,४ वटा वडामा तत्कालिन नेकपा एमाले (नेकपा) विजयी भएको छ ।

जम्मा ५० जना प्रतिनिधिमध्ये नाम परिवर्तनको पक्षमा ३१ जनाले हस्ताक्षर गरिसकेको ७ का वडाध्यक्ष रामदुलार मुखियाको भनाई छ ।

नगरपालिकाका प्रमुख प्रशासकीय अधिकृतले समेत नाम परिवर्तनको पक्षमा मेयरलाई सघाएर केही असन्तुष्टहरुलाई समेत झुक्याएर सहीछाप गराएको भन्दै वडाध्यक्षहरुले प्रमुख प्रशासकीय अधिकृतलाई कारबाहीको समेत माग गरेका छन् ।

उनीहरुले आफूहरुलाई कुनै पनि हालतमा महेन्द्रनारायण निधिको नामबाट नगरपालिकाको नाम स्वीकार्य नहुने चेतावनी दिनएका छन् । नगरपालिकाको नाम परिवर्तन गर्नुपरेमा सम्बन्धित सभामा तत्काल रहेको सदस्यसंख्याको दुई तिहाई बहुमतले पारित गरेको प्रस्ताव प्रदेश सरकारमार्फत केन्द्र सरकारलाई पठाउनु पर्ने संवैधानिक प्रावधान छ ।