काम गर्दागर्दै कठयाङग्रिएर मजदुरको मृत्यू, बिच्चलीमा खँग परिवार

न्यूज ब्यूरो, राजविराज । काम गरिरहेकै क्रममा कठ्याङ्ग्रिएर मृत्यु भएका मजदूर सप्तरीको कञ्चनरुप नगरपालिका–३ गोरपारका ३२ वर्षीय उमेश खंग परिवार बिचल्लीमा परेको छ ।

ज्यालामजदुरी गरेर परिवार चलाउँदै आएका उनी शुक्रबार छत ढलान गर्न वडा १२ स्थित रुपनगर पुगेका थिए । अत्यधिक चिसो र त्यसमाथि हावा चलिरहेका बेला छतमा काम गरिरहेका उमेशको हात–खुट्टा चल्न छाडेको थियो । त्यहीँ बेहोस भएपछि उनलाई उपचारको लागि धमेश्वर अस्पताल लगिए पनि त्यहाँ उपचार सम्भव भएन ।

थप उपचारका लागि कञ्चनपुर अस्पताल लैजाँदा बाटोमै उनको मृत्यु भएको थियो । उमेशको मृत्युपछि उनकी श्रीमती दरोपतिकुमारी र १९ दिनकी छोरी नेहाकुमारीको बिचल्ली भएको हो । ‘परिवारको गुजारा चलाउने नै उहाँ हुनुहुन्थ्यो, हिजो अत्यधिक चिसो लागिरहँदा पनि छाक टार्ने र नवजात छोरीलाई न्यानो लुगा नरहेको चिन्ताले काममा जानुभएको थियो,’ दरोपतिकुमारीले भनिन्, ‘ऐलानी जग्गामा बनाएको टहरामा बसोबास छ ।

बाक्लो लुगा नभएर उहाँ पातलो ज्याकेट र हाफ पाइन्ट लगाएरै मजदुरी गर्नुहुन्थ्यो ।’ दरोपतिकुमारीलाई श्रीमानको मृत्यु भएको पीडामा किरिया खर्च पु¥याउनै पनि कठिन भइरहेको छ । त्यसमाथि उनलाई कठ्याङ्ग्रिदो चिसोमा नवजात छोरीलाई एक्लै हुर्काउन र छाक टार्ने चिन्ताले सताइरहेको छ । शनिबार उमेशको दाहसंस्कार सकेर उनका भतिजा ७ वर्षका किशोरकुमार किरिया बसेका छन् ।

नगरपालिकाका स्वास्थ्य शाखा प्रमुख जनस्वास्थ्य अधिकृत रामसेवक यादवले अत्यधिक चिसोको बेला छत ढलानको कार्य गरिरहेका उनको कठ्याङ्ग्रिएर मृत्यु भएको बताए । ‘चिसोले उहाँको हात–खुट्टा काम गर्न छोडेपछि उपचारको लागि धमेश्वर अस्पताल पनि पु¥याइयो,’ उनले भने, ‘त्यहाँ उपचार सम्भव नभएपछि कञ्चनपुर अस्पताल ल्याउँदा–ल्याउँदै बाटोमै खंगको मृत्यु हुन गयो ।’

नगरपालिकामा देखिएको विवादले यसपटक कठ्याङ्ग्रिदो चिसोमा पनि गरिब विपन्नलाई लुगाफाँटो वितरण गर्न नसकिएको उनको भनाइ छ । वडाध्यक्ष गुल्टेन चौधरीले आर्थिक रुपमा अति विपन्न रहेका ती परिवारको घर पुगेर थप जानकारी लिने बताए ।