प्रहरीको "मोस्ट वाण्टेड" सूचिमा रहेका शर्मा बने मन्त्री !

न्यूज ब्यूरो |
जनकपुरधाम, १०, साउन । नेपाल प्रहरीको मस्ट वाण्टेडको सुचिमा रहेका राष्ट्रिय जनता पार्टी नेपालका प्रदेश सांसद अभिराम शर्मा मन्त्री बनेका छन् । भनेर आजको न्यूजपेपर दैनिक पत्रिकाले समाचार छापेको छ ।

राष्ट्रिय जनता पार्टी नेपाल (राजपा)को सिफारिसमा शर्मा सहित अन्य तीन मन्त्रीले एक्कै साथ बुधवार सपथ ग्रहण गरेका हुन् ।

राष्ट्रिय जनता पार्टी नेपालले सिफारिस गरेको शर्मा सहित सुरेश मण्डल, डिम्पल कुमारी झालाई बुधबार मुख्यमन्त्री लालबाबु राउतले प्रदेश प्रमुख रत्नेश्वरलाल कायस्थ र सभामुख सरोज कुमार यादव सहित अन्य मन्त्री तथा सांसदको उपस्थितिमा सपथ ग्रहण गराईएको थियो ।

बुधवार प्रदेश मुख्यालयको परिसरमा भित्र सपथ ग्रहण चलिरहँदा बाहिर भने, प्रहरीको वान्टेड सूचीमा रहेका अभिराम शर्मालाई राज्यमन्त्रीमा पार्टीले सिफारिस गरेपछि केही नेता तथा कार्यकर्ताहरुले बाहिर विरोध गरिरहेका थिए ।

मधेस आन्दोलनका क्रममा महोत्तरी जिल्लाको सदरमुकाम जलेश्वरमा घाइते भएका प्रहरी सहायक निरिक्षक थमन विकलाई उपचार गराउन प्रहरीले लैजाँदै गर्दा बाटामै रोकी एम्बुलेन्सबाट निकालेर हत्या गरेको आरोप शर्मामाथि छ ।

महोत्तरी जिल्ला अदालतले पक्राउ गर्न प्रहरीलाई आदेश दिए पनि पक्राउ गर्न सकेको थिएन । प्रहरीले भने, फरार अभियुक्तको सूचीमा राखेर उनको खोजी गरिरहेको थियो ।

यता राष्ट्रिय जनता पार्टी नेपालका महासचिव केशव झाले राज्यपक्षबाट आन्दोलनको समयमा लगाएको आरोप प्रमाणित नभईसकेको र प्रहरीको मृत्यु नै बनावटी भएको दावी गरे ।

उनले भने, ‘प्रहरीको हत्यामा विदेशमा रहेको व्यक्तिलाई समेत अभियुक्त बनाईएको छ, एउटा प्रहरीको हत्यामा निर्दोष व्यक्तिलाई फसाईनुले घटना आफैमा रहस्यम रहेको छ ।’

उनले थप्दै भने, ‘जनता नै सबैभन्दा ठुलो अदालत र सार्वभौम सरकार भएकोले अभिराम शर्मा जस्ता व्यक्तिलाई प्रचण्ड मत दिएर जिताएको जनताको भावनाको कदर गर्दै पार्टीले नाम सिफारिश गरेको हो । भनेर समाचार न्यूज पेपर दैनिकमा प्राथमिकताका साथ प्रकाशित गरिएको हो ।