पूर्व मन्त्री तामाङ र कलेज सँचालक प्रसाईलाई कानुनी कारवाही गर्न २४ घण्टे अल्टिमेटम

न्यूज ब्यूरो |
जनकपुरधाम, ९ साउन । केही दिन अघि संघीय सरकारका पूर्व कानुनमन्त्री शेर बहादुर तामाङ र मेडिकल सँचालक दुर्गा प्रसाईलाई कानुनी कारवाहीको लागि मेडिकल पढने विद्यार्थीहरुले सरकारसँग माग गरेका छन् ।

बँगलादेशमा मेडिकल अध्ययनरत विद्यार्थीहरुको सँगठन "नेप्लीज स्टुडेन्ट एशोसिएशन बँगलादेश" ले एक बुधबार एक प्रेस विज्ञप्ति जारी गर्दै बँगलादेशमा मेडिकल अध्ययन गर्ने नेपाली चेली उपर गरेको अभद्र टिप्पणीमाथि ध्यानाकर्षण गर्दै मन्त्रीको राजीनामाले दाग नधुल्ने भनेर कानुनको दायरामा ल्याउनुपर्ने माग अघि सारेका छन् ।

संघीय सरकारका पूर्व कानुनमन्त्री तामाङ र झापा स्थित रहेको बि एण्ड सी मेडिकल कलेजका सँचालक दुर्गा प्रसाईले बँगलादेशमा अध्ययन गर्ने नेपाली चेलीहरुप्रति अपशब्द र नाकारात्मक अभिव्यक्ति दिएको भन्दै अहिले समाजिक सञ्जालमा अनेकानेक टिकाटिप्पणी भईरहेको छ ।

आफ्नो अभिव्यक्तिले नेपाली चेलीहरुमा चोट पुगेको तथा समग्र जनतामा नै अघात पुगेको भन्दै क्षमा माग्दै पूर्व कानुनमन्त्री शेर बहादुर तामाङले मन्त्री पदबाट राजिनामा दिसकेका छन् ।

बँगलादेशमा मेडिकल पढने नेपाली छात्राहरु आफ्नो अस्मिता बेचेर मेडिकलको सर्टिफिकेट लिने गरेको जस्ता दागपूर्ण, भ्रामकपूर्ण र अशोभनीय तथा तथ्यहिन अभिव्यक्ति दिएको भन्दै राजीनामाको लागि चौतर्फी दबाब सहित चौतर्फी आलोचना भएपछि तामाङले पत्रकार सम्मेलन गरी राजीनामा गरेका हुन् ।

यता, बँगलादेशमा मेडिकल पढने विद्यार्थीहरुको छाता संगठन "नेप्लीज स्टुडेन्ट एशोसिएशन बँगलादेश" ले राजीनामा मात्र काफी नभएको भन्दै कानुनी दायरामा नै ल्याउनुपर्ने माग गरेका छन् ।

"यस घटनाले बँगलादेशमा अध्ययनरत सम्पूर्ण विद्यार्थी र अभिभावकमा समेत नाकारात्मक आघात पुगेको छ , यसरी आफ्नो पद र गरिमाको खयालै नगरी यस्ता घृणित पाराले नेपाली चेलीहरुको ईज्जतमा दाग लगाउने, कपोकल्पित, भ्रमपूर्ण, तथ्यहिन कटाक्ष गर्ने मन्त्री तामाङको राजीनामा र व्यवासयी प्रसाईले माफी माग्नुको कुनै औचित्य देखिदैन, यसले पक्कै बँगलादेशमा अध्ययनरत नेपाली चेलीहको मान सम्मन फिर्ता आउने छैन ।" प्रेस विज्ञप्तिमा उल्लेख छ ।

यसका साथै, उनीहरुले प्रेस विज्ञप्तिमा - "नेपाली चेलीहरुलाई बदनाम गरेर प्रसाई जस्ता व्यवसायी र राजनेताले मेडिकल कलेज खोल्ने निहुँमा व्यापार गर्ने कमजोर मानसिकताबाट अभिप्रेरित रहेको र यस भ्रमपूर्ण प्रकारका टिप्पणीमा कुनै सत्यता रहेको छैन । साथै यस्ता घृणित पाराले नेपाली चेलीहरुको ईज्जतमा दाग लगाउने कपोकल्पित , भ्रमपूर्ण, तथ्यहिन कटाक्ष गर्ने र नीच मानसिकताबाट ग्रसित मन्त्री तामाङले यथाशिघ्र मन्त्री पदबाट राजीनामाको कुनै विकल्प थिएन । साथै एक मेडिकल कलेजका सँचालक भएर चिकित्सा शिक्षा जस्ता संवेदनशिल विषयलाई खिल्ली उडाउँदै संसनीपूर्ण कटाक्ष गर्ने व्यवसायी प्रसाई र तामाङलाई तुरुन्तै कानुनको दायरामा ल्याइ कडा कारवाहीको माग यसै विज्ञप्तिमा गराउन चाहन्छौँ ।" उल्लेख छ ।

उनीहरुले दुवै जनालाई २४ घण्टा भित्र कानुनको दायरामा नल्याए यस विरुद्ध कडा संघर्षमा उत्रन बाध्य हुने एशोसिएशनका केन्द्रीय अध्यक्ष डा. राजु साहद्धारा जारी गरिएको विज्ञप्तिमा उल्लेख छ ।