सभामुख पदमुक्त भएपछि उनले राखेका करार कर्मचारीहरुलाई समेत हटाउने निर्णय

न्यूज ब्यूरो, जनकपुरधाम । मधेश प्रदेशसभा सभामुख रामचन्द्र मण्डल पदमुक्त भएको भोलिपल्ट उपसभामुख बबिता राउत इशरको आह्वानमा बसेको सर्वदलीय बैठकले मण्डल कार्यकालमा नियुक्त भएका करार कर्मचारीहरू हटाउने निर्णय गरेको छ।

बैठकका सहभागीहरूका अनुसार सभामुख पदमुक्त भएसँगै सचिवालयमा रहेका करार कर्मचारीको निरन्तरताबारे नयाँ निर्णय आवश्यक ठानिएको हो।

बुधबार सभामुखविरुद्ध दर्ता भएको महाअभियोग प्रस्तावमाथि छलफलको तयारी भइरहेकै समयमा प्रदेशसभा भवनको विद्युत् सेवा अवरुद्ध भएको घटनाले नयाँ विवाद सिर्जना गरेको थियो। सर्वदलीय बैठकले उक्त घटनाको सत्यतथ्य पत्ता लगाउन प्रदेश प्रहरी कार्यालयलाई औपचारिक छानबिन गर्न आग्रह गर्ने निर्णय गरेको छ।

यस्तै, महाअभियोग प्रस्ताव दर्तादेखि पारित हुनसम्मको प्रक्रियामा सहयोगात्मक भूमिका नखेलेको आरोप लागेका केही प्रदेशसभा सचिवालयका कर्मचारीहरूसमक्ष स्पष्टीकरण माग्ने निर्णय पनि बैठकले गरेको एक सांसदले जानकारी दिए।

उपसभामुख राउत इशरको संयोजकत्वमा बसेको बैठकमा एमाले संसदीय दलका नेता तथा विवादित मुख्यमन्त्री सरोजकुमार यादवसहित सबै दलका प्रतिनिधिहरू सहभागी थिए।