जनकपुर रुपैठाको चारैतर्फ निषेधाज्ञा !

न्यूज ब्यूरो, जनकपुरधाम । धनुषा प्रशासनले जनकपुरको रुपैठाको चारैतर्फ निषेधाज्ञा जारी गरेको छ । जनकपुरधाम २० रुपैठामा दुई समुदायबीच तनाव बढेपछि निषेधाज्ञा लगाएको हो ।

धनुषाका प्रमुख जिल्ला अधिकारी शँकरहरी आचार्यले शुक्रबार रुपैठामा भएको हिन्दु र मुस्लिम समुदयबीचको झडपपछि निषेधाज्ञा जारी गरेको हो ।

आज साँझ ६ः३० बजेदेखि लागू हुने गरी प्रशासनले रुपैठाको चारैतर्फ क्षेत्रलाई समेटेर कुनै पनि सभा, जुलुस, नाराबाजी, बैठक, सामुहिक कार्यक्रम गर्न नपाउने आदेशमा भनिएको छ ।

दुर्गा मूर्ति विसर्जनको क्रममा दुई समुदायबीच विवाद भएपछि तनावग्रस्त बनेको हो । रुपैठाको पूर्व लोहना जाने बाटो, पश्चिममा बसहिया जाने बाटो, उत्तरमा बाबा पेट्रोल पम्प सिक्सलेन र दक्षिणमा गँगुली पूलसम्म प्रदर्शन, भेला, नारा जुलुस गर्न नपाउने आदेश जारी गरेको हो ।

गत महिना मात्र गणेश पूजापछि मूर्ति विसर्जनमा त्यहाँमा मुस्लिम समुदाय र हिन्दु समुदायबीच झडप भएको थियो । पुनः दुर्गाको मूर्ति विसर्जनमा अवरोध भएपछि झडप भएको हो ।