आज लाग्दैछ सूर्य ग्रहण, कति बजे हुनेछ सुरु ? हेर्नुहोस विस्तृत

न्यूज ब्यूरो, जनकपुरधाम । यस वर्षको अन्तिम सूर्य ग्रहण आज राति लाग्दैछ। खगोलविद्हरूका अनुसार आज राती ११ः१४ बजेदेखि सुरु हुने आंशिक सूर्य ग्रहण राती (बिहान) १:२६ बजे चरममा पुगेर बिहान ३:३८ बजेसम्म रहनेछ।

यद्यपी, हिन्दु परम्परा अनुसार राती ठिक ११ः०० बजेदेखि सूर्य ग्रहण मान्नेछन् । बिहान ४ बजेसम्मको लागि सूर्यग्रहणलाई मान्यता दिइनेछ ।

ग्रहण दक्षिणी गोलार्धका देशहरू अष्ट्रेलिया, न्यूजिल्याण्ड, दक्षिण प्रशान्त महासागर र एन्टार्कटिकाबाट मात्र देखिनेछ। नेपालमा सूर्य अस्ताइसकेपछि ग्रहण लाग्ने भएकाले यहाँबाट प्रत्यक्ष दृश्यता नहुने खगोलविद्हरूको भनाइ छ।

हिन्दू परम्परामा ग्रहणलाई राहु–केतुको प्रभाव मानिँदै आएको छ। ग्रहण अवधिमा स्नान, मन्त्रजाप र दानले पुण्य प्राप्त हुने विश्वास छ। तर धार्मिक विज्ञहरूका अनुसार ग्रहण देखिँदैन भने सूतककाल लागू हुँदैन।

स्वास्थ्य विज्ञहरूले जहाँ ग्रहण देखिन्छ त्यहाँका लागि प्रत्यक्ष सूर्य नहेर्न, विशेष सुरक्षा चश्मा प्रयोग गर्न र गर्भवती महिला, बच्चा तथा वृद्धलाई विशेष सतर्कता अपनाउन सल्लाह दिएका छन्।

नेपालमा प्रत्यक्ष दृश्यता नभए पनि आस्थागत र सांस्कृतिक रूपमा यसबारे चासो उच्च रहेको छ।