अध्यक्ष पदको लागि डा. राउतविरुद्ध आफ्नै नेताहरुको विद्रोह,, अध्यक्ष बन्न नेताहरुको लाम

न्यूज ब्यूरो, जनकपुरधाम । जनमत पार्टीभित्र नेतृत्व परिवर्तनको मागसहित असन्तुष्टि बढेको छ। पार्टीभित्रबाट सार्वजनिक गरिएको विज्ञप्तीमा अध्यक्ष डा. चन्द्रकान्त (सि.के.) राउत र संगठन विभाग प्रमुख डा। जयकान्त राउतले पार्टीलाई स्वच्छ, लोकतान्त्रिक र जनपक्षीय संस्थामा रुपान्तरण गर्न स्वेच्छाले राजीनामा दिनुपर्ने माग गरिएको छ।

जनमत पार्टीका केही नेता कार्यकर्ताहरुद्धारा जारी गरिएको विज्ञप्तीमा हालको राजनीतिक परिस्थिति, भ्रष्टाचार, नातावाद, कृपावाद र कुशासनविरुद्ध जनमत पार्टीले देखाएको संघर्षको स्मरण गर्दै पार्टीमा आत्मसमीक्षा र नेतृत्वमा परिवर्तन आवश्यक भएको उल्लेख छ। विज्ञप्तीअनुसार, पार्टीभित्र देखिएको निर्णय प्रक्रियाको अपारदर्शिता र नेतृत्वको अकर्मण्यताले संगठनको मूल उद्देश्य, विचार र कार्यक्रम कमजोर बनेको आरोप लगाइएको छ।

पार्टीको आन्तरिक सुधार र जनआस्थाको पुनःस्थापना गर्न नेतृत्व परिवर्तन अपरिहार्य भएको भन्दै विज्ञप्तीमा अध्यक्ष र संगठन विभाग प्रमुखलाई स्वेच्छिक राजीनामा दिन हार्दिक आग्रह गरिएको छ। साथै, पार्टी निर्माणदेखि अहिलेसम्म योगदान पुर्याएका सम्पूर्ण नेता, कार्यकर्ता र सदस्यलाई पार्टीको पुनर्गठन र सुदृढीकरणमा सक्रिय भूमिका निर्वाह गर्न पनि आह्वान गरिएको छ।

विज्ञप्तीमा पार्टीलाई “भ्रष्टाचारमुक्त, पारदर्शी र जनमुखी” बनाउने प्रतिबद्धता दोहोर्याइएको छ।

जनमतका प्रवक्ता शरदसिँह यादव, पूर्वमन्त्री एवम् उपाध्यक्ष अब्दुल खान, जनमत युवा संघका केन्द्रीय सँयोजक सँजय यादव, स्वास्थ्यकर्मी जनमत संघका अध्यक्ष सिके सिँह लगायतका नेता कार्यकर्ताहरुले अध्यक्ष पद छाडन अल्टिमेटम दिएको हो । अध्यक्ष राउतलाई २४ घण्टे अल्टिमेटम दिएको हो ।

जानकारी अनुसार, अल्टिमेटम बुझाएका नेताहरुले अध्यक्ष पदको लागि कसरतमा रहेका छन् ।