देशभक्त र लोकतन्त्रवादीहरु एकजुट भएर संविधानको रक्षा गरौँः नेता महासेठ

न्यूज ब्यूरो, जनकपुरधाम । नेकपा एमालेका नेता एवम् केन्द्रीय सचिव रघुवीर महासेठले संविधानको रक्षा गर्न देशभक्त र लोकतन्त्रवादीहरुले एक जुट हुनुपर्ने बताएका छन् ।

०६२।६३ को आन्दोलनबाट प्राप्त उपलब्धि षड्यन्त्रपूर्वक मेटाउन खोजिएको भन्दै देशभक्त र लोकतन्त्रवादी शक्तिहरू एकजुट भई संविधान र सार्वभौमिकताको रक्षा गर्नुपर्नेमा जोड दिएका छन् ।

महासेठले जारी गरेको वक्तव्यमा एमाले, कांग्रेस, माओवादी लगायत संसदमा प्रतिनिधित्व गर्ने शक्तिहरुलाई आन्दोलनबाट प्राप्त उपलब्धिको रक्षा गर्न सबै एकजुट हुन आग्रह गरिएको छ । उनले संविधान विरोधी शक्तिको दबाबमा नपर्न र जनताका उपलब्धि गुम्न नदिन देशभक्त र लोकतन्त्रवादी सबैलाई अनुरोध गरेका छन् ।

जेन्जी पुस्ताले आह्वान गरेको आन्दोलनमा स्वार्थी तत्वले घुसपैठ गरी ताण्डव मच्चाएको महासेठको भनाइ रहेको छ । भदौ २३ गतेको आन्दोलनमा ज्यान गुमाउनेहरूप्रति श्रद्धाञ्जली व्यक्त गर्दै २४ गतेको आन्दोलनमा देखिएको हिंसा, लुटपाट र आगजनीप्रति गम्भीर दुःख प्रकट गरिएको वक्तव्यमा उल्लेख गरिएको छ ।

महासेठले जारी गरेको वक्तव्यमा सिंहदरबार, सर्वोच्च अदालत, मन्त्रालय, सञ्चार माध्यम, व्यवसायिक प्रतिष्ठानदेखि निजी घरहरूमा गरिएको आक्रमणलाई “जेन्जी पुस्ताको आन्दोलन होइन, आपराधिक गतिविधि” भन्दै घोर भर्त्सना गरिएको छ ।

उज्यालो भविष्यका लागि सुरु गरिएको आन्दोलनलाई ढाल बनाएर आपराधिक तत्वले मच्चाएको ध्वंस अक्षम्य रहेकाले संलग्न जो कोहीलाई हदैसम्मको कारबाही गर्नुपर्ने महासेठले वक्तव्यमार्फत उल्लेख गरेका छन् ।

परिवर्तन सबैको चाहना हो तर परिवर्तनको नाममा मानिसलाई आगो लगाउने, लुटपाट गर्ने र जंगली शासन झल्काउने काममा संलग्न अपराधीलाई कारबाही गर्नुका साथै उत्पन्न परिस्थितिको समाधान संविधानकै मार्गबाट खोज्नुपर्नेमा जोड दिइएको छ ।

संविधानबाहिर गएर गरिने कुनै पनि निर्णय नेपाली जनतालाई मान्य नहुने भन्दै सम्बद्ध सबै पक्षलाई सचेत रहन महासेठको आग्रह छ ।