धनुषाको वीरेन्द्रबजारमा भव्य व्यापार मेला लाग्दै, केही कलाकारप्रति स्थानीयको आपत्ति

न्यूजब्यूरो, जनकपुरधाम । धनुषाको वीरेन्द्रबजारस्थित भोलीदेखि व्यापार मेला लाग्ने भएको छ । ईन्द्र पूजाको अवसर पारेर १० दिने व्यापार मेला लाग्ने भएको छ ।

गणेशमान चारनाथ नगरपालिकामा पहिलोपटक “इन्द्र पुजा व्यापार मेला महोत्सव २०८२” सुरु हुने भएको हो। चारनाथ उद्योग वाणिज्य संघको आयोजनामा हुने महोत्सवमा व्यापार, उद्योग, स्थानीय उत्पादन, खेलकुद, सांस्कृतिक प्रस्तुति र धार्मिक परम्परालाई एकैसाथ समेटिने समितिका अध्यक्ष महेश साहले जनाए ।

१० दिने व्यापार मेलामा महिला नर्तकी ज्योति मगर, प्रिति पासवानप्रति केही स्थानीयहरुले आपत्ति जनाएका छन् । केही दिन अगाडी सिरहाको लहानमा भएको लहान एक्सपोमा अश्लिल नृत्य प्रदर्शन गर्ने त्यस्ता महिला नर्तकी ल्याएपछि चौतर्फी विरोध भएको थियो ।

यहाँको समाजलाई अपच हुने खालेको नृत्य, गीत गाउने तेस्रो दर्जाका कलाकारहरु ल्याएर उद्योग वाणिज्य संघले समाजप्रति गैर जिम्मेवारी प्रदर्शन गर्न लागेको आरोप छ ।

यता, अध्यक्ष साहले भने अन्य ठाउँमा हुँदा कुनै आपत्ति नहुने यही समाजले व्यापार मेलामा हुँदा आपत्ति जनाउनुको अर्कै कारण भएको हुन सक्ने बताए । उनले ठुला कलाकारहरुको सेडुल व्यस्त भएपछि मजबुरीमा उनीहरुलाई बोलाउनु परेको बताए ।

मेलाको क्रममा कलश यात्रा भदौ २१ गते शनिबार १० हुनेछ भने यस महोत्सवको प्रमुख आकर्षणका रूपमा वृहत् शान्ति फुटबल प्रतियोगिता रहनेछ।

महोत्सव स्थलको अवलोकन उद्योग वाणिज्य संघका अध्यक्षसहित पदाधिकारी, वडा अध्यक्ष, स्थानीय क्लबका युवा, पत्रकार तथा सरोकारवाला निकायले संयुक्तरूपमा गरेका छन्।

व्यापार मेलाबाट चारनाथ उद्योग वाणिज्य संघले मोटो आर्थिक व्यवस्थापन गर्ने लक्ष्य लिएको हो ।