नेता नीधिकै गृह नगरपालिका दुई बर्षदेखि बन्धक, मेयर यादवको जिद्दले जिरो विकासमा नगराईन

न्यूज ब्यूरो, जनकपुरधाम । नेपाली काँग्रेसका नेता एवम पूर्व उपप्रधान तथा गृहमन्त्री बिमलेन्द्र नीधिको गृह नगर रहेको धनुषाको नगराईन नगरपालिका विगत एक बर्षदेखि बन्धक बनेको छ । 

नगरपालिकाका मेयर बिनय कुमार यादवले जिद्द कसेपछि नगराईन नगरपालिका विगत एक बर्षदेखि बन्धक बनेको छ । मेयर यादवले नगरपालिकामा कार्यरत निमित्त प्रमुख प्रशासकीय अधिकृत रामगुलाम कर्णलाई जसरी पनि राख्ने जिद्दले नगरपालिका बन्धक बनेको आरोप स्थानीयहरुको छ । 

नेपाली काँग्रेस पार्टी निकट रहेका रामगुलाम कर्णले नगराइनमा जमाएको व्यवस्थाको कारण नगराइन नगरवासीले दुःख भोग्नुपरेको दुखेसो स्थानीयहरुको छ । 

नेपाली काँग्रेस पार्टीबाट निर्वाचित मेयर यादवले निमित्त प्रमुख प्रशासकीय अधिकृत कर्णलाई नै निरन्तरता दिएपछि समस्या जटिल भएको हो । 

संघीय मामिला तथा समान्य प्रशासन मन्त्रालयले नगराइन नगरपालिकाको लागि उपसचिव सुधिर कुमार साहलाई कामकाजमा खटाएपनि मेयर यादवले उनलाई हाजिर गराउन चाहेका छैनन् । मन्त्रालयबाटै पत्राचार भएको साहलाई हाजिर नगराउँदा विवाद चुलिएको हो । 

वर्तमान निमित्त अधिकृत रामगुलाम कर्णको आर्थिक तथा प्रशासनिक जिम्मेवारी रद्दको पत्राचार मन्त्रालयले गरेपनि मेयर यादवले जिद्द कसेपछि समस्या उत्पन्न भएको बताईएको छ । 

गत असार २७ गतेमा गरिएको मन्त्रालयको चलानी नं. २२७७ ले रामगुलाम कर्णको आर्थिक तथा प्रशासनिक जिम्मेवारी मुक्त गरिएको उल्लेख छ । उनको ठाउँमा उपसचिव सुधिर कुमार साहलाई खटाएको छ , तर मेयर यादवले साहलाई हाजिर हुन दिएको छैनन् । 

मन्त्रालयको पत्र र आदेशलाई समेत नमान्ने मेयर यादवलाई माथिल्ला तहका नेतृत्वको हात रहेको बताईन्छ । कार्यपालिकामा अल्पमतमा रहेका मेयर यादवले रामगुलाम कर्णलाई नै निमित्तको रुपमा राख्ने हठ कसेका छन् । 

सुधिर जस्ता कैयौँ हाकिम नगराइनको लागि पठाइएपनि मेयर यादवले उनीहरुलाई हाजिर गराउन चाहदैनन् । अप्रत्यक्ष रुपमा धम्काउने, काम गर्न नदिने, हाजिर हुन आए क्षति पुरयाउने जस्ता धाकधम्की दिने गरेको कारण अधिकृतहरु आउन चाहदैनन् । आउन चाहने अधिकृतलाई हाजिर भने गर्न दिदैनन् । 

मन्त्रालयले देशको सबै पालिकाहरुमा सम्बन्धित कर्मचारी पठाउँदै निमित्तविहिन बनाएको घोषणा गरिएको छ । यद्यपी, नगराईनमा भने अझै निमित्तले कार्यालय चलाईरहेको गुनासो स्थानीय जनसमुदायको छ । 

यस सन्दर्भमा मेयर यादवसँग प्रतिक्रिया लिन खोज्दा उनको मोबाईलमा अहिले सम्पर्क हुन सकेन भ्वाईस म्यासेज आएको हो ।