नेपाल भारत बोर्डरबाट तीन आतंकवादी भारत प्रवेश गर्ने आशंकामा बोर्डर र बिहारमा हाई अलर्ट

न्यूज ब्यूरो, जनकपुरधाम । छिमेकी मुलक भारतको बिहारस्थित सुरक्षा एजेन्सीहरूले उच्च सतर्कता जारी गरेका छन्। प्राप्त गोप्य सूचनाअनुसार पाकिस्तानी आतङ्कवादी समूह जैश–ए–मोहम्मद का तीन जना सदस्य नेपाल हुँदै भारत प्रवेश गर्ने तयारीमा रहेको आशंका गरिएको छ।

भारतीय सञ्चारमाध्यमका अनुसार ती तीनै जनाको पासपोर्ट र विवरण समेत सुरक्षा निकायहरूसँग पुगेको छ। रिपोर्टअनुसार उनीहरू रक्सौल नाका हुँदै बिहार प्रवेश गर्ने योजनामा रहेको बताइएको छ।

यसै पृष्ठभूमिमा बिहार प्रहरीले सीमावर्ती क्षेत्रमा चेकिङ अभियान कडा बनाएको छ। मोतिहारीका प्रहरी प्रमुख (एसपी) स्वर्ण प्रभातले खुफिया निकायबाट अलर्ट प्राप्त भएलगत्तै जिल्लाभर सतर्कता जारी गरिएको जनाए। उनका अनुसार सीमावर्ती इलाका र प्रमुख सडकमार्गमा सवारीसाधनको गहन चेकजाँच सुरु गरिएको छ।

एसपी प्रभातले सम्पूर्ण प्रहरी अधिकारी र जवानलाई सतर्क रहन निर्देशन दिइएको जानकारी दिएका छन्। साथै, उनले स्थानीयलाई समेत शंकास्पद व्यक्तिलाई देखे तत्काल प्रहरीलाई जानकारी दिन आग्रह गरेका छन्।

सुरक्षा एजेन्सीले सूचना दिने व्यक्तिलाई ५० हजार भारतीय रुपैयाँ पुरस्कारको व्यवस्था गरिएको जनाएको छ। यसका लागि मोतिहारी प्रहरी प्रमुखलाई सीधै +९१-९०३१८२७१०० वा +९१-९४३१८२२९८८ नम्बरमा सम्पर्क गर्न वा व्हाट्सएपमार्फत खबर गर्न सकिनेछ। साथै, भारतको आपतकालीन नम्बर ११२ मा समेत सम्पर्क गर्न सकिनेछ।

खुफिया स्रोतका अनुसार नेपाल सीमाबाट भारत प्रवेश गर्ने जोखिम उच्च रहेको भन्दै सीमा क्षेत्रको निगरानी अझै कडा पारिएको छ। सुरक्षाकर्मीलाई उच्च सतर्कतामा रहन निर्देशन दिइएको छ।