कमला नगरपालिकाका लागि नगर प्रहरी तालिम सुरु, तालिमपछि ड्युटी हुनेछ सुरु

न्यूज ब्यूरो, जनकपुरधाम । कमला नगरपालिकाले झण्डै ७ बर्षपछि नगर प्रहरी ल्याएको छ । नगरपालिका भएपनि नगर प्रहरी नहुँदा समाजिक कार्यहरुमा अवरोध हुन थालेपछि नगरपालिकाले आफ्नो नगर प्रहरी भर्ना गरेको छ ।

सोही क्रममा नगर प्रहरीलाई लक्षित गरी ३० दिने तालिम आजदेखि सुरु भएको छ। तालिम सशस्त्र प्रहरी बल नं. ८ गण हेडक्वाटर, धनुषामा सञ्चालन गरिएको हो।

उद्घाटन कार्यक्रममा कमला नगरपालिकाका नगर प्रमुख विशेश्वर यादव प्रमुख अतिथि रहनुभएको थियो। कार्यक्रममा नगर प्रशासन प्रमुख बीरेन्द्र कुमार सढान विशिष्ट अतिथिका रुपमा उपस्थित हुनु भयो। तालिमको उद्घाटन समारोहको अध्यक्षता भने सशस्त्र प्रहरी बल धनुषाका एसपी निर्मल खडकाले गर्नुभयो।

कार्यक्रमलाई सम्बोधन गर्दै नगर प्रमुख यादवले नगर प्रहरीलाई व्यावसायिक, अनुशासित र जिम्मेवार बनाउने उद्देश्यले तालिम सुरु गरिएको बताउनुभयो। उहाँले नगरपालिकामा सुरक्षाको प्रत्याभूति दिलाउन नगर प्रहरीको भूमिका महत्त्वपूर्ण हुनेमा जोड दिनुभयो।

सशस्त्र प्रहरीका प्रशिक्षकहरूको व्यवस्थापनमा सञ्चालन हुने यो तालिममा सहभागी नगर प्रहरीलाई अनुशासन, तालिम, कानून पालन, जनसेवा, अपराध नियन्त्रण लगायतका विषयमा सैद्धान्तिक र व्यावहारिक ज्ञान प्रदान गरिनेछ।

उक्त तालिम ३० दिनसम्म सञ्चालन हुनेछ।