मधेश प्रदेशमा पहिलो पटक युवा नीति सम्बन्धी छलफल

न्यूज ब्यूरो, जनकपुरधाम । खेलकुद तथा समाज कल्याण मन्त्री प्रमोद जयसवालले मधेश प्रदेशमा अब युवामैत्री नीति छिटो लागू हुने बताएका छन्। जनकपुरधामस्थित होटल सिता शरणमा शनिबार सम्पन्न ‘मधेश प्रदेश युवा नीति तर्जुमा सम्बन्धी परामर्श कार्यक्रम’लाई सम्बोधन गर्दै मन्त्री जयसवालले नीति पारित गर्दा सबै जिल्लाका युवाको आवाज समेटिने स्पष्ट पारे।

मन्त्री जयसवालले भने, “यो युवा नीति हामीले छिटो (फास्ट ट्र्याक) बाट पारित गर्छौं, तर यसलाई पारित गर्दा सबै जिल्लाका युवाहरूको आवाज समेत समेटिनेछ।”

कार्यक्रममा मधेश प्रदेश युवा संजालका अध्यक्ष मो. नइम राईनले लामो संघर्ष र निरन्तर प्रयासपछि नीति निर्माण प्रक्रियाको थालनी हुनु महत्त्वपूर्ण उपलब्धि भएको बताए। “हामी निरन्तर संघर्षरत थियौं, आज पहिलो पटक छलफल सुरु हुनु हाम्रो आन्दोलन र समर्पणको फल हो,” उनले भने।

नीति तथा योजना आयोगका उपाध्यक्ष डा. शोहन साहले युवालाई कृषि रोजगारीसँग जोड्ने प्रावधान आवश्यक रहेको धारणा राखे। “प्रदेशको प्रमुख अर्थतन्त्र कृषि भएकाले युवा नीति र कार्यक्रमले कृषिमुखी रोजगारीसँग जोडिन जरुरी छ,” उनले बताए।

कार्यक्रमको अध्यक्षता मन्त्रालयका नि. प्रदेश सचिव रञ्जित कुमार यादवले गरेका थिए। सहजकर्ताका रूपमा जुरी नेपालका कृष्ण जिवी घिमिरे र गुञ्जन रायले युवा नीतिको प्रारम्भिक रूपरेखा प्रस्तुत गरेका थिए। सहभागी युवाहरूले शिक्षा, रोजगारी, खेलकुद, स्वास्थ्य, कृषि, नेतृत्व, उद्यमशीलता, लैङ्गिक समानता र सामाजिक न्यायलाई प्राथमिकतामा राख्नुपर्ने सुझाव दिएका थिए।

मन्त्रालयका महाशाखा प्रमुख परशुराम कार्कीले सञ्चालन गरेको कार्यक्रममा प्रदेशका उच्च अधिकारी, युवा प्रतिनिधि, सामाजिक अभियन्ता र विभिन्न संघसंस्थाका प्रतिनिधिहरूको उल्लेख्य उपस्थिति थियो।