वन संरक्षण प्राथमिकतामा राखेर चाडपर्व मनाउन वनमन्त्री यादवको निर्देशन

न्यूज ब्यूरो, जनकपुरधाम । मधेश प्रदेशका वन तथा वातावरण मन्त्री संजय कुमार यादवले चाडपर्वलाई उल्लासपूर्ण ढंगले मनाउनुका साथै वन संरक्षणलाई प्राथमिकतामा राख्दै विशेष अनुगमन तथा गस्ती बढाउने स्पष्ट निर्देशन दिएका छन् ।

पर्वको समयमा धेरै कर्मचारीहरू विदामा रहने भएकाले वनजन्य चोरी निकासी र अवैध गतिविधि बढ्ने आशंका रहन्छ। यसलाई नियन्त्रण गर्न मन्त्री यादवले स्थानीय समुदाय, डिभिजन वन कार्यालय, सामुदायिक वन उपभोक्ता समूह र सुरक्षाकर्मीबीच अझ मजबुत सहकार्य आवश्यक रहेको उल्लेख गरे।

“वन हाम्रो साझा सम्पत्ति हो। यसलाई जोगाउनु सबैको जिम्मेवारी हो। पर्वमा रमाइलो गर्दै पनि प्रकृतिप्रतिको कर्तव्य पूरा गर्नुपर्छ।”– उनले भने ।

मन्त्री यादवले भने, “प्रदेशभरका संवेदनशील वन क्षेत्रमा विशेष गस्ती टोली परिचालन गर्ने तयारी भइरहेको छ। यस कदमले वनजन्य चोरी निकासी नियन्त्रणमा मात्र होइन, जैविक विविधता संरक्षण र दिगो वन व्यवस्थापनमा समेत सकारात्मक योगदान पुर्‍याउने विश्वास लिइएको छ।

वन मन्त्रालयका अनुसार, पर्व तथा विशेष अवसरमै सचेत कदम चाल्दा दीर्घकालीन रूपमा वन अपराध नियन्त्रण र स्रोत संरक्षण सम्भव हुने देखिएको छ। यसले वन मन्त्रालयप्रति सर्वसाधारणको विश्वास बढाउने मात्र होइन, प्रदेशलाई हरियाली, सुरक्षित र दिगो विकासतर्फ उन्मुख गराउने अपेक्षा गरिएको छ