'घुमौँ मधेश, बुझौँ मधेश' को लागि सँयोजक ठाकुरले भेटे भारतीय रक्षामन्त्री सिँह, पर्यटन बढाउन माग

न्यूज ब्यूरो, ३० साउन । मधेश प्रदेश सरकारको “घुमौ मधेश, बुझौ मधेश” कार्यक्रमका संयोजक विकाश कुमार ठाकुरले मधेश प्रदेशका धार्मिक र ऐतिहासिक पर्यटकीय स्थलहरूको विकास, प्रवर्द्धन र अन्तर्राष्ट्रिय प्रचार–प्रसारका लागि भारतसँग औपचारिक सहकार्यको पहल गरेका छन्।

बिहीबार उनले भारतका रक्षा मन्त्री राजनाथ सिंहलाई नयाँदिल्लीस्थित मन्त्रालयमा भेटी १० बुँदे विस्तृत ज्ञापनपत्र हस्तान्तरण गरे। उक्त भेटमा कांग्रेस नेता तथा पूर्वसांसद अभिषेकप्रताप शाह पनि उपस्थित थिए।

ठाकुरले भारतसँग सीमा जोडिएको मधेश प्रदेशको धार्मिक, सांस्कृतिक र ऐतिहासिक स्थलहरू नेपाल–भारतको साझा सांस्कृतिक सम्पदा भएको उल्लेख गर्दै, ती स्थललाई भारतका प्रमुख धार्मिक पर्यटन मार्गसँग जोड्नु दुवै देशका लागि लाभदायी हुने तर्क गरे। “मधेश प्रदेशमा रहेका धार्मिक र ऐतिहासिक सम्पदालाई संरक्षण, प्रवर्द्धन र प्रचार–प्रसारमा भारतको सक्रिय सहयोगको अपेक्षा राखेर यो पहल गरेको हुँ,” उनले भने।

जवाफमा मन्त्री सिंहले नेपाल–भारतबीचको ऐतिहासिक र धार्मिक सम्बन्धलाई अझ सुदृढ बनाउँदै समयानुकूल अघि बढाउनुपर्नेमा जोड दिए। उनले मधेश प्रदेशको पर्यटन वर्षलाई भारतका प्रधानमन्त्रीको आसन्न नेपाल भ्रमणको एजेन्डामा समावेश गर्ने प्रतिबद्धता जनाउँदै, धार्मिक तथा पर्यटन आदान–प्रदानमा चाँडै सकारात्मक कदम चाल्ने आश्वासन दिए।

ज्ञापनपत्रमा जनकपुरधाम (माता सीताको जन्मभूमि), धनुषाधाम, महागढीमाई मेला स्थल, देवधाम, जलेश्वरनाथ महादेव, बाबा टुटेश्वरनाथ महादेव, श्री चमेली माई मन्दिर, रजवा महादेव, शितलीमाई मन्दिर, नाढीमन ताल, नुनथर पहाड, छिन्नमस्ता भगवती, कंकालनी माता, दुर्गा भगवती, सहलेश फुलवारी, बाबा हरिहरनाथ मन्दिरलगायतका दर्जनौं आस्था–केन्द्रलाई नेपाल–भारतको साझा धार्मिक सम्पदा मानेर तिनीहरूको संरक्षण र अन्तर्राष्ट्रिय स्तरमा प्रचारको आवश्यकता औंल्याइएको छ।

ज्ञापनपत्रमा राखिएका मुख्य मागहरूमा ‘रामायण सर्किट’ अन्तर्गत जनकपुरधामलाई विशेष रूपमा समावेश गर्ने, जनकपुर(अयोध्या धार्मिक पर्यटन करिडोरलाई थप सशक्त बनाउने, विशेष पर्यटक बस तथा रेल सेवा सञ्चालन गर्ने, जनकपुरधाम–अयोध्या सीधा हवाई उडान प्रारम्भ गर्ने, भारतीय लगानी र प्रविधि सहयोगमार्फत पर्यटन पूर्वाधार विकास गर्ने, बोर्डर टुरिज्ममा मधेशका धार्मिक स्थलहरू समावेश गर्ने, संयुक्त सांस्कृतिक अभियान सञ्चालन गर्ने, भारतीय धार्मिक नगरीहरूमा मधेशका आस्था–केन्द्रबारे जानकारीमूलक डिजिटल बोर्ड राख्ने, र ‘सीता विना राम अधुरो, यसकारण पहिले अयोध्या अनि जनकपुरधाम’ नारा सहित प्रचार अभियान सञ्चालन गर्ने प्रस्ताव समावेश छन्।

मधेश प्रदेश सरकारको विश्वास छ—भारतसँगको यस सहकार्यले धार्मिक पर्यटनलाई नयाँ गति दिने मात्र होइन, दुवै देशका सांस्कृतिक सम्बन्धलाई अझ प्रगाढ बनाउँदै मधेश प्रदेशलाई विश्वस्तरमा परिचित धार्मिक पर्यटन गन्तव्यका रूपमा स्थापित गर्नेछ।