शहिदनगरमा प्रदेश साँसद यादवले ५ किलोमिटर कालोपत्रे (पिच) को लागि गरे भूमिपूजन

न्यूज ब्यूरो, २९ साउन । मधेश प्रदेशका साँसद राम अशिष यादवले धनुषाको शहिदनगरमा एक कालोपत्रे सडकको लागि भूमिपूजन गरेका छन् ।

जनता समाजवादी पार्टी नेपालका नेता समेत रहेका प्रदेश सांसद यादवले मधेश प्रदेश सरकारको बजेटबाट निर्माण हुने ५ किलोमिटर दुरीको कालोपत्रे सडकको लागि विहिबार भूमिपूजन गरेका हुन् ।

शहिदनगरका नगर प्रमुख दिनेश प्रसाद यादव, वडा नं. ५ का अध्यक्ष सुरेश कापरले संयुक्त रुपमा सो सडकको भूमिपूजन गरेका हुन् । “एक प्रदेश सभा निर्वाचन क्षेत्र,५ किलोमिटर कालोपत्रे पक्की सडक निर्माण परियोजना” को संयुक्त रुपमा भूमि पुजन गरि शुभारम्भ गराएका छन्।

समाजवादी नेता प्रदेश सांसद रामअशिष यादबको सिफारिस तथा अथक प्रयासले र भौतिक पूर्वाधार विकास मन्त्रालय मधेश प्रदेशको सहयोगबाट शहिदनगर नगरपालिका वार्ड नं ५ कट्टी विर्ता स्थित परिक्रमा सडक देखि शहिद पथ सिमरापट्टी– पचहर्वा ( बफै हुंदै हुलाकी राजमार्ग सम्म ५ किलोमिटर दुरीमा कालोपत्रे पक्की सडकको निर्माण गरिने कुरा पुर्वाधार विकास कार्यालय धनुषाले जनाएको छ।

सो अवसरमा सम्बोधन गर्दै प्रमुख अतिथि समाजवादी नेता प्रदेश सांसद रामअशिष यादवले ग्रामीण क्षेत्रको विकासको पुर्वाधार गुणस्तरीय कालोपत्रे पक्की सडक रहेको कुरा बताउनुभएको छ।

उहाँले ग्रामीण क्षेत्रको बासिन्दालाई एक पालिकाबाट अर्को पालिकामा सहज पहुँच गर्न उदेश्यले मधेशका प्रथम मुख्यमन्त्री लालबाबु राउत नेतृत्वको सरकारले मधेश प्रदेशको गौरवको परियोजनाको रुपमा एक प्रदेश सभा निर्वाचन क्षेत्र,५ किलोमिटर कालोपत्रे सडक निर्माण परियोजनाको शुभारम्भ गरिएको थियो र वर्तमान मधेश सरकारले पनि प्रदेशका कालोपत्रे सडक निर्माण परियोजनलाई निरन्तरता दिदै आएको कुरा उल्लेख गरेका छन्।

कार्यक्रमका विशिष्ट अतिथि शहिदनगर नगरपालिकाका नगर प्रमुख दिनेश प्रसाद यादवले कालोपत्रे पक्की सडक निर्माण भएपछि स्थानीयबासीहरुलाई आवतजावत गर्न निकै सहज हुने बताए ।

शहिदनगर नगरपालिका वार्ड नं ५ का वार्ड अध्यक्ष सुरेश कापरले प्रदेश सांसद रामअशिष यादबको सिफारिस र प्रयासमा निर्माण हुन लागेको कालोपत्रे पक्की सडक महत्वपूर्ण परियोजना रहेको कुरा बताए ।

सो अवसरमा पुर्वाधार विकास कार्यालय धनुषाका प्राविधिक इन्जिनियर संजित ठाकुर, सडक निर्माण का कन्ट्रयाक्टर शैलेन्द्र साह, समाजसेवी राम लखन पासवान, राजदेव पासवान,राम दयाल सदा, राम अशिष मुखिया,वौऐलाल महरा,राम दयाल साह, धनेश्वर साह, सागर दास सहित स्थानीयबासीहरुको उल्लेखनीय सहभागिता रहेको थियो।