जनकपुरधामको मिथिलाबिहारी मन्दिरमा मनाइयो भगवानको भव्य झुला

न्यूज ब्यूरो, २३ साउन । जनकपुरधाम उपमहानगरपालिका वडा नं १ स्थित ऐतिहासिक पुलचौकमा रहेको मिथिलाबिहारी मन्दिरमा झुला पूजा यस वर्ष पनि धूमधामका साथ मनाइएको छ।

मन्दिरका अध्यक्ष राधाकृष्ण साह (किसन) का अनुसार, प्रत्येक वर्ष झैं यस वर्ष पनि श्रावण महिनाको विशेष अवसरमा झुला पूजा आयोजना गरिएको हो। झुला पूजामा भक्तजनहरूको उल्लेखनीय उपस्थिति रह्यो भने, मन्दिर वरपरको वातावरण भक्तिमय बनेको मन्दिरमा विभिन्न प्रकारका झुलाहरू, फूलमालाले सजाइएको मूर्ति, झाँकी र भक्तिमय संगीतले पूजाको आकर्षण अझै बढेको थियो।

अध्यक्ष साहले जानकारी गराए अनुसार, झुला पूजाको अवसरमा विशेष पूजा, भजन–कीर्तन र प्रसाद वितरण पनि गरिएको थियो। कार्यक्रमलाई सफल बनाउन मन्दिर समितिका सदस्यहरू, स्थानीय बासिन्दा र स्वयम् सेवकहरूको सक्रिय भूमिका रहेको थियो।

झुला पूजा अबको केही दिनसम्म निरन्तर चल्ने जनाइएको छ। मन्दिरमा दर्शन तथा पूजाका लागि स्थानीय भक्तजनका साथै बाह्य क्षेत्रबाट पनि श्रद्धालुहरूको आगमन बढ्दो छ।