जनकपुरमा २ अर्ब ४५ करोड लगानीमा २०० बेडको क्यान्सर अस्पताल बन्ने

न्यूज ब्यूरो, १२ साउन । जनकपुरमा २ अर्ब ४५ करोडभन्दा बढी लागतमा विशिष्टीकृत विनयतारा क्यान्सर अस्पताल निर्माण हुने भएको छ। विनयतारा क्यान्सर ट्रस्टले जनकपुर उपमहानगरपालिका वडा नम्बर २५ मा अत्याधुनिक सेवा सुविधासहितको २०० बेडको अस्पताल बनाउन लागेको हो।

वन तथा वातावरण मन्त्रालयमा बुझाइएको वातावरणीय प्रभाव मूल्यांकन (ईआईए) प्रतिवेदनअनुसार, करिब ३ विगाहा १३ कठ्ठा ११.५ धुर क्षेत्रफलमा अस्पताल निर्माण गरिनेछ। अस्पतालमा एक बेसमेन्ट, एक भुइँतलासहित चारतले भवन रहनेछ।

हाल ट्रस्टले २५ शय्याको क्यान्सर अस्पताल सञ्चालन गरिरहेको छ। नयाँ अस्पताल बनेपछि मेडिकल अंकोलोजी, अंकोलोजी सर्जरी, इन्टरनल मेडिसिन, ग्यास्ट्रो अंकोलोजी, हेड एन्ड नेक अंकोलोजी, एनेस्थेसिया, रेडियोलोजी, प्याथोलोजी, ग्यास्ट्रोलोजी, ग्यास्ट्रोइन्टेरो सर्जरी, क्रिटिकल केयर, पल्मोनरी क्रिटिकल केयर, स्लिप मेडिसिन, इन्टरभेन्सनल रेडियोलोजी, मोलीक्युलर बायोकेमेस्ट्री, इम्युनोप्याथोलोजी, मोलीक्युलर प्याथोलोजी, हेमाटोप्याथोलोजी, बर्न सर्जरी, जेनेटिक मेडिसिनलगायत विविध सेवा उपलब्ध हुने बताइएको छ।

ईआईए प्रतिवेदनअनुसार अस्पतालमा दैनिक ३०० जनालाई बाहिरंग सेवा दिइनेछ भने आकस्मिक सेवा वर्षभरि ३६५ दिन सञ्चालन हुनेछ। अस्पताल सञ्चालनका लागि ३०६ जनाले रोजगारी पाउने छन्। त्यसमध्ये सुशासन र व्यवस्थापनतर्फ २१ जना, क्लिनिकल सेवामा २६४ जना र सहयोग सेवातर्फ २१ जना कर्मचारी रहने उल्लेख छ।

अस्पताल ३६ महिनाभित्र निर्माण सम्पन्न गर्ने लक्ष्य लिइएको छ। निर्माणपछि स्थानीयस्तरमा क्यान्सर उपचारको पहुँच वृद्धि हुनुका साथै रोजगारी सिर्जना हुने र स्वास्थ्य पर्यटन प्रवर्द्धनमा समेत टेवा पुग्ने अपेक्षा गरिएको छ।