सिसा भाँचिएपछि थन्केको थन्कै धनौजी गाँपाको एम्बुलेन्स, जनप्रतिनीधिहरु हाले कानमा तेल 

न्यूज ब्यूरो, जनकपुरधाम । धनुषाका धनौजी गाउँपालिकाको एम्बुलेन्स सवारी साधन सानो प्राविधिक समस्या र (काँच भाँचिनु) पछि महिनौंदेखि प्रयोगमा आउन नसकेपछि  थन्किएको अवस्थामा राखेका छन्। 

स्वास्थ्य सेवाको प्राथमिक साधनको रूपमा रहेको एम्बुलेन्स सञ्चालन नहुँदा बिरामी तथा आकस्मिक अवस्थाका नागरिकहरू मर्कामा परेका छन्। तर, यथार्थमा जनप्रतिनिधिहरू भने यसप्रति कुनै चासो नराखी मौन बसेका छन्।

स्थानीय स्रोतअनुसार, केही महिना अघि एक सवारी दुर्घटनामा एम्बुलेन्सको अगाडिको काँच (विन्डस्क्रिन) भाँचिएको थियो। त्यो सानो मर्मतसमेत नगरिएको कारण हाल एम्बुलेन्स धनौजी स्वास्थ्य चौकीको प्राङ्गणमा थन्किएर राखिएका छन्।

धनौजी गाउँपालिकामा एम्बुलेन्स सेवा नहुँदा आकस्मिक बिरामीहरू निजी सवारी वा टेम्पु प्रयोग गर्न बाध्य छन्। खर्चिलो र असहज विकल्पका कारण स्वास्थ्यमा प्रत्यक्ष असर परेको स्थानीयवासीको गुनासो छ।

एक स्थानीय बासिन्दाले भने, “सानो काँच फेरेर चलाउने साधन हो, तर पालिकाले त्यति गर्न नसक्नु लाजमर्दो कुरो हो।”

वडास्तरका जनप्रतिनिधि तथा स्वास्थ्य शाखा संयोजकहरू समेत यस विषयमा जिम्मेवारी लिन तयार देखिँदैनन्। न त मर्मतको पहल गरिएको छ, न त वैकल्पिक व्यवस्था नै। यसले स्थानीय सरकारको स्वास्थ्यप्रति गैरजिम्मेवारीपन र स्रोत साधनको दुरुपयोगलाई उजागर गरेको देखिन्छन् ।

धनौजी गाउँपालिकाले तुरुन्त एम्बुलेन्स मर्मत गरी सेवा सञ्चालन गर्नुपर्छ, अन्यथा जिम्मेवार व्यक्तिविरुद्ध जनदबाब सिर्जना गरिने स्थानीयहरू बताउँछन् ।