विदेह नगरपालिकामा खानेपानी संकट, ट्युवेलको पानी नआएपछि मोटर र बोरिङ सञ्चालनमा रोक

न्यूज ब्यूरो, जनकपुरधाम । विदेह नगरपालिका वडा नं. १ स्थित ठाढी गाउँमा यो वर्ष वर्षा नहुनु र पानीको मुहान सुक्नुले गम्भीर खानेपानी संकट उत्पन्न भएको छ। करिब २५० घरधुरी प्रभावित भएको वडाध्यक्ष सञ्जय पाण्डेयद्वारा जारी सूचनामा उल्लेख गरिएको छ।

सूचना अनुसार, स्थानीय ट्युवेलबाट पानी नआउने (सुक्केको) अवस्था सिर्जना भएपछि वडाबासीहरूलाई समस्या थप चर्किएको छ। यस्तो अवस्थामा, वडाकार्यालयले वडाका सम्पूर्ण कृषकहरूलाई खेत सिँचाइका लागि हाल प्रयोग हुँदै आएका मोटर, बोरिङ तथा डिजेल पम्पजस्ता उपकरणमार्फत पानी तान्न तत्काल रोक लगाएको छ।

वडाध्यक्ष पाण्डेयले हस्ताक्षरित सूचनामा भनिएको छ, “खानेपानीको समस्या झन गम्भीर बन्ने देखिएकोले यस्ता सिँचाइ उपकरण प्रयोग नगर्न हार्दिक अनुरोध गरिन्छ।”

स्थानीय ट्युवेल सुकिसकेकाले खेतीबाली सिँचाइभन्दा पहिले आम जनताको पिउन पानीको आवश्यकता प्राथमिक भएको वडाका स्रोतले जनाएका छन्। यस सूचना मार्फत वडावासीहरूलाई तत्काल सिँचाइ कार्य नगर्न अनुरोध गरिएको छ।