कमला नगरपालिका र मुखियापट्टि मुसरनियाँ गाँपाका आगलगी पीडितलाई वनमन्त्री यादवको निःशुल्क काठ

न्यूज ब्यूरो, जनकपुरधाम । मधेश प्रदेशका वन तथा वातावरण मन्त्री सँजय यादवले आगलगी पीडितहरुलाई निःशुल्क काठ उपलब्ध गराएका छन् ।

डिभिजन वन कार्यालय धनुषा मार्फत मन्त्री यादवले धनुषाको कमला नगरपालिका र मुखियापट्टि गाउँपालिकाका आगलगीबाट पीडित भएका परिवारलाई सालको काठ वितरण गरिएको हो ।

वन मन्त्री संजय यादवको प्रमुख आतिथ्यमा आईतबार विहान एक कार्यक्रमबीच कमला र मुखियापट्टिका २३ जना अग्नि पीडितहरुलाई काठ वितरण गरिएको डिभिजन वन कार्यालय धनुषाका अधिकृत अनिलकुमार साहले जानकारी दिएका छन् ।

काठ वितरण समारोहमा धनुषा जिल्ला वन अधिकृत विनोद सिंह, वन मन्त्रालयका सचिव उद्धववहादुर घिमिरे, निर्देशक जग्गनाथप्राद जैसवाल, मन्त्रालयका महाशाखा प्रमुख अञ्जना कायस्थ, कमला नगरपालिकाका मेयर विशेश्वर यादव उपस्थित रहेका थिए ।

काठ वितरण समारोहलाई सम्वोधन गर्दै वन मन्त्री यादवले मधेश प्रदेशका अग्नि पीडितहरुलाई काठ उपलव्ध गराई दिनकालागि सम्वन्धित वन कार्यालयहरुलाई निर्देशन दिएका थिए ।

उनले भने–‘समस्यामा परेका आम जनतालाई राहत दिनुपर्छ, जनतालाई सक्दो सहयोग तपाईहरु गरिदिनुस ।’ मधेश प्रदेशमा वनको संरक्षण सम्वद्र्धन गर्ने जिम्मेवारी सम्पूर्ण मधेश प्रदेशवासीको रहेको बताउँदै मन्त्री यादवले संरक्षण सम्वद्र्धन संगै वृक्षरोपण कार्यमा समेत सम्पूर्ण मधेशवासी अग्रसर हुनुपर्ने बताएका थिए ।

कार्यक्रममा जिल्ला वन अधिकृत सिंह, सचिव घिमिरे, निर्देशक जैसवाल, महाशाखा प्रमुख कायस्थ, मेयर यादव लगायतले आम जनतालाई सक्दो सहयोगको भावना राख्न सम्वन्धीत निकायहरुको ध्यानाकर्षण गराएका थिए ।