सँचारकर्मी साहमाथि भएको दुरव्यवहारप्रति महासंघको आपत्ति, दोषीलाई कारवाहीको माग

न्यूज ब्यूरो, जनकपुरधाम । महोत्तरीको पूर्वाधार विकास कार्यालय परिसरमा समाचार संकलनको क्रममा एपीटीभी न्यूजका पत्रकार दिवाकर साहमाथि भएको दुर्व्यवहारप्रति नेपाल पत्रकार महासंघ मधेश प्रदेश समिति गम्भीर ध्यानाकर्षण भएको जनाएको छ।

असार २३ गते राति कार्यालय परिसरमा गतिविधि भइरहेको सूचनाका आधारमा रिपोर्टिङका लागि पुगेका पत्रकार साहमाथि केही व्यक्तिहरूले अभद्र व्यवहार गरेका थिए। उक्त घटनाका दृश्यहरू सामाजिक सञ्जालमा सार्वजनिक भएका भिडियामा स्पष्ट देखिन्छ कि पत्रकारलाई समाचार संकलनमा अवरोध पु¥याउँदै दुर्व्यवहार गरिएको हो।

पत्रकारमाथिको यस्तो व्यवहारलाई महासंघले प्रेस स्वतन्त्रतामाथिको खुला हस्तक्षेप र लोकतान्त्रिक मूल्य–मान्यताको उल्लंघनको संज्ञा दिएको छ। “समाचार संकलनको क्रममा पत्रकारलाई यसरी अवरोध गर्नु र धम्क्याउनु स्वतन्त्र प्रेसमाथिको सीधा आक्रमण हो,” महासंघका महासचिव शैलेन्द्र महतो क्रान्तिले जारी गरेको प्रेस विज्ञप्तिमा भनिएको छ।

महासंघले घटनामा संलग्न व्यक्तिहरूमाथि कानुनी कारबाही गर्न माग गर्दै पत्रकार सुरक्षाको प्रत्याभूति दिलाउन सम्बन्धित निकायको ध्यानाकर्षण गराएको छ। महासंघले प्रेस स्वतन्त्रता र पत्रकारको सुरक्षाप्रति कुनै सम्झौता नहुने उल्लेख गर्दै प्रेस विरोधी गतिविधिप्रति सशक्त प्रतिवाद गर्ने चेतावनीसमेत दिएको छ।