धनुषाको धनौजीमा बिना कार्यादेशको आधा असारमा निर्माण कार्य, बजेट पचाउने दाउ

न्यूज ब्यूरो, जनकपुरधाम । दक्षिणी धनुषाको धनौजी गाउँपालिकाको धनौजीमा निर्माण कार्य सम्पन्न हुने बेलामा निर्माण कार्य सुरु गरिएको छ ।

अबेर गरी भएको गाउँसभापछि कुनै पनि कार्य सँचालन नहुने बताइएपनि धनौजी गाउँपालिका वडा नं. २ का वडाध्यक्ष उदय साहले आफ्नो वडामा बिना कार्यादेशको कामकाज सुरु गरेपछि विवाद चुलिएको छ ।

धनौजी गाउँपालिकाका प्रमुख प्रशासकीय अधिकृत हरिशँकर यादवले एउटा नै कार्यादेश नहुने दाबी गरेपनि वडाध्यक्ष साहलाई कार्य गर्न अनुमति दिएको आरोप छ । वडा नं. २ का वडावासीहरुले नै यसको विरोध जनाएपछि प्रकरण बाहिरिएको छ ।

असार १५ बितिसक्दा कार्य सुरु गरिएको छ । असार २४ गतेसम्म मात्र भुक्तानीको प्रक्रिया हुनेछ । यसमा १० दिनमा निर्माण कार्य सम्पन्न गरी कागज मिलान गरी बजेट पचाउने दाउमा रहेको बुझिएको छ ।

धनौजी गाउँपालिकाकी उपाध्यक्ष रामबति मण्डल यसलाई निगरानीमा राखेको बताईन् । वडाध्यक्ष साहले भने किसानहरुको लागि आकस्मिक काम गर्ने गरी नाला निर्माण गर्न लागेको बताए ।