बिहानै धनुषामा तीन जना सवार मोसा दुर्घटना, एकको घटनास्थलमै मृत्यू, दुई गम्भिर !

न्यूज ब्यूरो, जनकपुरधाम । धनुषामा एकाविहानै भएको मोटरसाईकल दुर्घटनामा परी एक जनाको घटनास्थलमै मृत्यू भएको छ भने दुई जनाको अवस्था गम्भिर रहेको छ ।

धनुषाको कमला नगरपालिका र विदेह नगरपालिकाको सीमा क्षेत्र पर्ने मुडिया सराबेको सीमामा हुलाकी मार्ग छेउमा दुर्घटना भएको छ । गएराती जन्तीबाट आउँदै गरेका तीन जना सवार मोटरसाईकल दुर्घटना भएको हो ।

धनुषाको महेन्द्रनगरदेखि जन्तीबाट फर्किदै गर्दा तीव्र गतिको कारण दुर्घटना भएको देखिएको छ । घाईतेहरुको अवस्था हेर्दा उनीहरु मापद पदार्थ सेवन गरी सवारी चलाएको स्थानीयहरुले बताएका छन् ।

अनटेस्ट नम्बर प्लेट रहेको मोटरसाईकलमा सवारी धनुषाको शहिदनगर नगरपालिका वडा नं. ८ बिसरभोरा बस्ने एक जना युवकको घटनास्थलमै मृत्यू भएको छ । सोही वडाका नाथपट्टि बस्ने दुई जनाको अवस्था गम्भिर रहेको छ । उनीहरुको नाम भने खुल्न सकेको छैनन् ।

आज बिहान करिब ३ बजेको समयमै दुर्घटना भएको हुन सक्ने प्रहरीले जनाएको छ । बिहान मर्निँग वाकमा निस्केका व्यक्तिहरुले दुर्घटना भएको देखेपछि प्रहरीलाई खवर गरेको थियो । तत्कालै आएको प्रहरीले उनीहरुलाई उपचारको लागि जनकपुर पठाएकोमा एक जनाको मृत्यू भएको घोषणा चिकित्सकले गरेको हो ।