नेदरल्यान्ड्समाथि नेपालको शानदार जीत

न्यूज ब्यूरो, जनकपुरधाम । कुशल भुर्तेलको उत्कृष्ट अर्धशतक र बलिङ आक्रमणको सामूहिक प्रदर्शनको मद्दतमा नेपालले स्कटल्याण्डमा जारी त्रिदेशीय टी–२० अन्तर्राष्ट्रिय शृंखलामा दोस्रो जित दर्ता गर्न सफल भएको छ। बिहीबार ग्लास्गोमा सम्पन्न खेलमा नेपालले नेदरल्याण्ड्सलाई ६ विकेटले पराजित गर्दै शृंखलामा सशक्त उपस्थित जनायो।

नेदरल्याण्ड्सले दिएको १७५ रनको चुनौती नेपालले १९.४ ओभरमा ४ विकेटको क्षतिमा सहजै पार गर्दै जित हात पार्‍यो। नेपालका ओपनर कुशल भुर्तेलले इनिङको सुरुवातमै लय बनाउँदै ५१ बलमा ६ चौकासहित ६५ रनको महत्वपूर्ण पारी खेले। अर्का ब्याट्सम्यान आरिफ शेखले ३९ रन बनाए, तर उनी १६८ रन हुँदा रिटायर्ड हर्ट हुन पुगे।

यसै खेलमा अन्तर्राष्ट्रिय टी२० डेब्यू गरेका भीम सार्कीले संयमित प्रदर्शन गर्दै २७ रन बनाए। बलिङतर्फ नेदरल्याण्ड्सका बेन फ्लेचर, आर्यन दत्त, रोलफ भान डर मर्वे र जाच लायन काचेटले समान रूपमा १-१ विकेट हात पारे।

लेभिटको पारी रंगीन, तर जित नेपालको पोल्टामा

त्यसअघि टस जितेर फिल्डिङ रोजेको नेपालले नेदरल्याण्ड्सलाई २० ओभरमा ७ विकेटमा १७४ रनमै सीमित पार्‍यो। नेदरल्याण्ड्सका लागि माइकल लेभिटले आक्रमक ब्याटिङ गर्दै ५३ बलमा ८६ रन बनाए, जसमा उनले ६ चौका र ५ छक्का समावेश गरे।

एक समय ४५/४ को संकटमा परेको नेदरल्याण्ड्सलाई लेभिटले साकिब जुल्फिकरसँग ६३ रनको साझेदारी गर्दै उकासे। त्यसपछि १२९/७ को स्थितिमा भेट्रान अलराउण्डर रोलफ भान डर मर्वेले २१ बलमा ३६ रनको अविजित पारी खेले। उनले आर्यन दत्तसँग ४५ रनको साझेदारी गर्दै टिमको स्कोर १७४ सम्म पुर्‍याए।

नेपालका लागि करण केसीले ४ ओभरमा ४० रन खर्चिएर २ विकेट लिए। दिपेन्द्रसिंह ऐरी, सन्दीप लामिछाने, ललित राजवंशी र रुपेश सिंहले समान १-१ विकेट लिएका थिए।

अब नेपालको ध्यान अन्तिम खेलतर्फ

यो जितसँगै नेपालले शृंखलामा दोस्रो जित हासिल गरेको छ। यसअघि नेपाल नेदरल्याण्ड्ससँग सुपर ओभरसम्म गएको रोचक खेलमा पराजित भएको थियो, तर स्कटल्याण्डलाई हराउन सफल भएको थियो। अब नेपालले शुक्रबार शृंखलाको अन्तिम खेल स्कटल्याण्डसँग खेल्नेछ, जसमा जित हात पार्दै फाइनलमा पुग्ने सम्भावना बलियो बनाउने लक्ष्य हुनेछ।