मधेशको उद्योग र पर्यटन विकासमा आमूल परिवर्तन हुन्छः मन्त्री कुशवाहा

न्यूज ब्यूरो, जनकपुरधाम । मधेश प्रदेश सरकारका उद्योग, वाणिज्य तथा पर्यटन मन्त्री इन्जिनियर बसन्त कुशवाहाले प्रदेशमा उद्योगीकरण र पर्यटन क्षेत्रको विकासमा ूआमूल परिवर्तनू ल्याइने दाबी गरेका छन्।

मधेश सरकारले ल्याएको एक लाख रोजगारीसहितको ऐतिहासिक नीति कार्यक्रमपछि न्यूज ब्यूरोसँग कुराकानी गर्दै मन्त्री कुशवाहाले मधेश प्रदेशको उद्योग र पर्यटन विकासमा आमूल परिवर्तन भई रोजगारी सृजना हुने बताए ।

उनले भने, ““मधेश अब केवल उपेक्षित प्रदेश होइन, अबको मधेश आत्मनिर्भर, उद्यमशील र रोजगारी उत्पादन गर्ने केन्द्र बन्दैछ। उद्योग र पर्यटनको माध्यमबाट आर्थिक रूपान्तरणको स्पष्ट खाका तयार पारिएको छ।”

मन्त्री कुशवाहाका अनुसार, मधेशका विभिन्न स्थानहरूमा औद्योगिक ग्राम स्थापना गरिने छ। स्थानीय उत्पादनमा आधारित कच्चा पदार्थ प्रशोधन केन्द्र, विदेशी पयर्टन भित्र्याउने योजना, धार्मिक अनुसार भारतको अयोध्यासम्म नेपाल मधेश प्रदेशको पर्यटकीय स्थलहरुको प्रचार प्रसार गर्ने नीति ल्याएको हो । भारतमा दैनिक करोडौँ पर्यटक जाँने गरेकोमा प्रचार प्रसारको माध्यमबाट त्यसको १ प्रतिशत पनि पयर्टक मधेशमा भित्र्याउन सकिए यहाँको आर्थिक विकास बलियो हुने बताए ।

“स्थानीय स्रोतको उपयोग, सहकारी र निजी क्षेत्रको सहकार्यमा स्थायी औद्योगिक पूर्वाधार निर्माण गरिनेछ,” उनले थपे।

यस्तै, धार्मिक, सांस्कृतिक र जैविक विविधता भएको मधेशमा पर्यटनलाई व्यवसायिक बनाउने तयारी गरिएको मन्त्री कुशवाहाले बताए। जनकपुर, गढीमाई, थारु बस्ती, सप्तकोशी तथा अन्य स्थलहरूमा गन्तव्य पर्यटन विकास गरिने अवधारणा लागू हुने उनले बताए । त्यसका लागि पर्यटक मार्ग निर्माण, होमस्टे व्यवसाय प्रोत्साहन, र स्थानीय गाइड तालिम सञ्चालन गरिने जनाइएको छ।

“अब भाषण होइन, काम गरेर देखाउने समय”
मन्त्री कुशवाहाले स्पष्ट पार्दै भने, – “अब भाषण दिने समय सकियो। जनताले देख्ने र महसुस गर्ने खालको विकास कार्य अघि बढाउँछौँ।

उद्योग तथा पर्यटन क्षेत्रबाट रोजगारी सिर्जना, स्थानीय आर्थिक चक्रमा गतिशीलता, र स्थानीय उत्पादनको बजार सुनिश्चितता मुख्य लक्ष्य हुने उनले बताए।